Serik Jumanǵarın Taıaý Shyǵys týraly: Iran arqyly ótetin temirjolǵa úlken josparymyz bar edi

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Iran-Izraıl teketiresiniń Qazaqstannyń syrtqy saýdasyna qalaı áser etip jatqanyn aıtty.

- Qazir boljam jasaýǵa erte. Jaǵdaı qalaı ózgeretinin kútip otyrmyz. Beıbit kelisimge qol jetkiziledi dep úmittenemiz. Ne joǵaltamyz degenge kelsek, bárinen buryn Iranǵa azyq-túlik jetkizemiz. Bul oqıǵa ol saýdaǵa áser etpeıdi dep oılaımyn. Qaıtkende de halqyna azyq kerek, úlken el degen sııaqty. Bizdi alańdatyp otyrǵan jalǵyz másele – logıstıka, - dedi Serik Jumanǵarın Senattyń jalpy otyrysynan keıin.

Áńgime Iran temirjol arqyly ótetin tranzıttik tasymal týraly bolyp otyr.

- Ońtústikke aparatyn jol Iran arqyly ótedi. Basqa temirjol joq. Biraq ol jolmen ázirge sonshalyq kóp tasymaldap otyrǵan joqpyz. Óıtkeni ıran temirjolynyń jaǵdaıy sonshalyq jaqsy emes jáne stansa aýystyrý máseleleri bar. Degenmen úlken josparlarymyz bolǵan. Sondyqtan ahýaldy jiti baqylaımyz, - dedi vıtse-premer.

Eske salsaq, Qytaı Iran-Izraıl teketiresine áskerı is-qımyl arqyly kılikken AQSh-tyń áreketin qatań aıyptaǵan bolatyn.