Serik Jumanǵarın salyq túsimderiniń 3 trln teńgege ulǵaıý sebebin atady
ASTANA. KAZINFORM — Bıyl 9 aıdyń qorytyndysy boıynsha memlekettik bıýdjetke salyq túsimderi 19,3 trln teńgeni qurady. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Salyq reformasy bıýdjettiń kiris bazasyn nyǵaıtýdyń negizgi faktoryna aınalyp, aǵymdaǵy syn-qaterler jaǵdaıynda da túsimderdiń eleýli ósimin qamtamasyz etti. Nátıjeler qabyldanǵan sharalardyń fıskaldyq tıimdiliginiń joǵary ekenin jáne memlekettik qarjy turaqtylyǵynyń artqanyn kórsetip otyr. Bıyl toǵyz aıdyń qorytyndysy boıynsha memlekettik bıýdjetke salyq túsimderi 19,3 trln teńgeni qurap, ótken jyldyń sáıkes kezeńimen salystyrǵanda 3 trln teńgege nemese 18,2%-ǵa ulǵaıdy. Ósýdiń negizgi draıveri qosymsha qun salyǵy boldy. Ol boıynsha túsimder 37,3%-ǵa ósti, onyń ishinde ishki óndiris taýarlary boıynsha — 54,1%-ǵa, ımport boıynsha — 23,9%-ǵa, — dedi vıtse-premer.
Onyń aıtýynsha, eldegi kásipkerlik qyzmet oń dınamıkany saqtap, sondaı-aq syrtqy jáne ishki ekonomıkalyq ózgeristerge turaqtylyq kórsetip otyr.
— Bıznestiń qurylymdyq qaıta qurylýy baıqalady. Ózin-ózi jumyspen qamtyǵandardy eskergende kásipkerlik sýbektileriniń jalpy sany 32,5%-ǵa artyp, 3,2 mln-ǵa jetti. Jalpyǵa birdeı belgilengen rejımde jumys isteıtin kásipkerlerdiń — qosymsha qun salyǵyn tóleýshilerdiń sany 28%-ǵa ósti. Azamattardyń kóleńkeli ekonomıkadan shyǵýy úshin jaǵdaılar jasaldy. Ózin-ózi jumyspen qamtyǵandar rejıminde 981 myń adam tirkeldi, olardyń 807 myńy alǵash ret salyq esebine turdy. 2026 jylǵy toǵyz aıda 277 myń jańa kásipkerlik sýbektisi tirkelgen, onyń ishinde 34,7 myń zańdy tulǵa jáne 242,3 myń jeke kásipker. Osy kezeńde 19,7 myń zańdy tulǵa jáne 356 myń jeke kásipker esepten shyǵaryldy. Bul rette jeke kásipkerdi tirkeýdi toqtatý ekonomıkalyq qyzmettiń is júzinde toqtaýyn bildirmeıdi. Jabylǵan 356 myń jeke kásipkerdiń 42,6%-y 2025 jyly tabys tappaǵan, al 20,8%-y óz qyzmetin jalǵastyra otyryp, ózin-ózi jumyspen qamtyǵandar rejımine kóshken. Osylaısha, bıznes qurylymyn saýyqtyrý jáne kásipkerlerdiń neǵurlym qolaıly salyq rejımderine kóshýi júrip jatyr, — dedi Serik Jumanǵarın.
Aıta keteıik, bıyl 9 aıdyń qorytyndysynda el ekonomıkasynyń ósýi 4,2 paıyzdy quraǵany belgili boldy.
