Serik Jumanǵarın páter satyp alýda qolma-qol aqshasyz esep aıyrysýdy engizýge qatysty túsinik berdi
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın páter satyp alý kezinde qolma-qol aqshasyz esep aıyrysý usynysyna pikir aıtty.

Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaralyp jatyr.
Bul turǵyda Májilis depýtaty Baqytjan Bazarbek óz qyzmetine adal qaramaıtyn qurylys salýshylarǵa qatysty másele kóterdi.
— Depýtattyq korpýs túrli jumys toptarynda (talqylanyp jatqan zań jobalary aıasynda) qurylys kompanııalarynyń jaýapkershiligin qatańdatýǵa tyrysyp keledi. ıAǵnı, sapasyz baspana salatyn nemese zańsyz qurylys júrgizetinderge qatysty tıisti reestrdi engizýdi usynyp otyrmyz. Qazir Astanada osyndaı reestr resmı emes tártipte qurylǵan. Alaıda zańnamalyq deńgeıde rettelmegen. Menińshe, Astana, Almaty jáne Shymkent ákimdikteri osy máseleni sheshýge múddeli. Degenmen, depýtattyq korpýstyń bastamalaryna Úkimette teris qorytyndy shyǵaryp otyr. Máselen, basqa (zań jobasy boıynsha) jumys tobynda qurylys salýshylardyń qylmystyq jaýapkershiligin engizýge talpyndyq, biraq buǵan teris qorytyndy keldi. Sonymen qatar, páter satyp alý kezinde qolma-qol aqshasyz esep aıyrysý engizýge tyrystyq. Alaıda osyǵan da qoldaý jasalmady, — dedi Baqytjan Bazarbek.
Munymen qosa, depýtat elordadaǵy aqyly turaq ıeleri eleýli qarajat salmasa da, qomaqty tabys alyp otyrǵanyn aıtty. Sondyqtan osy jeke avtoturaqtardy memlekettiń qaraýyna qaıtarý usynysy atap ótildi.
Óz kezeginde Premer-mınıstrdiń orynbasary Serik Jumanǵarın atalǵan reestrge qatysty usynystardy Úkimet talqylaýǵa daıyn ekenin jetkizdi.
— Al (páter satyp alý kezinde) qolma-qol aqshasyz esep aıyrysýǵa toqtalsaq, qazir qaralyp jatqan reformalar aıasynda osy máselelerdi pysyqtap otyrmyz. Jalpy, salyq tóleýden jaltarýdy barynsha azaıtatyn normalar boıynsha qujatqa túzetýlerdiń ekinshi paketin (Májiliske) engizemiz. Sondyqtan bul salada depýtattardy birlese pikir almasýǵa shaqyramyn. Al aqyly turaqtarǵa qatysty aıtatyn bolsaq, qazir qaralyp otyrǵan ózgerister aıasynda máslıhattarda jańa fýnktsııalar paıda bolady, — dedi Serik Jumanǵarın.
Eske salsaq, jaqynda «Otbasy bank» aktsıonerlik qoǵamynyń basqarma tóraıymy Lázzat Ibragımova Qazaqstanda baspana alý kezinde qolma-qol aqshasyz esep aıyrysýdy engizý tetigi pysyqtalyp jatqanyn aıtqan edi.
Bıyl aqpan aıynda Astanadaǵy aqyly turaqtardy ákimdikke berýge qatysty pikir aıtyldy.