Serik Jumanǵarın «Ortalyq Azııa — Qytaı» iskerlik keńesi otyrysyn jyl saıyn ótkizýdi usyndy
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın «Ortalyq Azııa — Qytaı» iskerlik keńesiniń otyrysyn jyl saıyn turaqty ótkizip turýdy usyndy.
Eń alǵashqy otyrys osydan eki jyl buryn 2023 jyldyń 19 mamyrda Qytaıdyń Sıan qalasynda ótken edi. Búgin elordada «Ortalyq Azııa — Qytaı» iskerlik keńesiniń ekinshi otyrysy ótip jatyr.
− Bul ózara is-qımyl tetigin turaqty formatqa aınaldyryp, jyl saıyn ótkizýdi usynamyn. Bizdiń elderdiń iskerlik toptary qoǵamdyq jáne mádenı baılanystardy damytýda mańyzdy ról atqarady, bul túptep kelgende halyqtarymyz arasyndaǵy dostyq pen ózara túsinistiktiń nyǵaıýyna yqpal etedi, − dedi Serik Jumanǵarın.
Premer orynbasary qytaılyq áriptesterdi Qazaqstanda jáne Ortalyq Azııa elderinde bıznesti damytý úshin qolda bar múmkindikterdi paıdalanýǵa shaqyrdy.
− Qazaqstan Úkimeti sizder úshin senimdi ári aıqyn seriktes bola alady. Búgingi otyrys osy zalda otyrǵan bıznes-qaýymdastyq ókilderi úshin yntymaqtastyqtyń jańa múmkindikteri men keleshegin ashatynyna senimdimin, − dedi ol.
Aıta keteıik, búgin elordada «Ortalyq Azııa — Qytaı» ІІ sammıti ótedi. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.
Eń alǵashqy sammıt 2023 jyldyń 19 mamyrda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.
2024 jyly Ortalyq Azııa óńiri men Qytaı arasyndaǵy saýda qarqyny 95 mlrd AQSh dollaryna jetken jáne onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetken.
Sonymen birge, Ortalyq Azııanyń organıkalyq ónimderi Qytaı naryǵynda joǵary baǵalanady.