Serik Jumanǵarın óńirlerde fıtosanıtarııalyq is-sharalardy jandandyrýdy tapsyrdy
ASTANA. KAZINFORM - QR Úkimeti men óńirlerde shegirtkeniń taralýyna jol bermeý jáne fıtosanıtarııalyq is-sharalar júrgizý úshin jedel jumys komıssııalary qurylady.
Mundaı sheshim 13 mamyrda vıtse-premer Serik Jumanǵarınniń tóraǵalyǵymen ótken keńeste qabyldandy, dep habarlaıdy Úkimettiń baspasóz qyzmeti.
Mamyr-maýsym aılary – jerdi shegirtkege qarsy óńdeý úshin eń qolaıly merzim. Dál osy ýaqytta shegirtke jumyrtqalary jappaı kóbeıedi.
«Bizdiń boljamymyz boıynsha, shegirtkege qarsy is-sharalar temperatýra +25-30 gradýsqa deıin kóterilip, dernásilderdiń jappaı kóbeıetin sátinde, eldiń ońtústigi men batysynda 20 mamyrdan, soltústiginde, shyǵysynda jáne ortalyǵynda 30 mamyrdan bastap qolǵa alynady. Zııankestermen kúresý úshin 2,46 mln ga aýmaqty óńdeýge arnalǵan pestıtsıdter qory satyp alyndy. Barlyǵy 2,5 mln ga qajet. Qazirdiń ózinde 1,9 mln ga aýmaqty hımııalyq óńdeý boıynsha qyzmetterge shart jasaldy, qalǵany boıynsha konkýrstyq rásimder jalǵasýda. Óńdeý tehnıkasy aımaqtarda ornalasqan, pestıtsıdter qajet bolǵan jaǵdaıda saqtaý qoımalarynan jetkiziledi. Tıisti jumystardy bastaý úshin dernásilderdiń jappaı ósý jáne damý kezeńiniń bastalýyn kútemiz», — dedi aýyl sharýashylyǵy vıtse-mınıstri Azat Sultanov.
Túrkistan oblysy 16 sáýirden bastap birinshi bolyp asa qaýipti Marokko shegirtkesinen tazartýdy bastady. Óńdeletin jalpy aýdany – 272 myń ga. Búgingi tańda josparlanǵan aýmaqtyń 88% óńdeldi, bul – 240,3 myń ga alqap. Hımııalyq óńdeý jerden (101 birlik) jáne áýeden (6 birlik) arnaıy tehnıkamen júrgiziledi. Qoldanylatyn preparattar: «Pılarkıng v.k.» (14,3 myń ga), «Tıametrın s.k.» (189,8 myń ga), «Karat sýper k.e.» (18,2 myń ga), «Atset 200 r.n» (18 myń ga).
Aýyl sharýashylyǵy mınıstri Aıdarbek Saparov keńeste barlyq óńirler monıtorıngtik is-sharalar úshin tehnıkany belsendi qoldanýy tıis ekenin atap ótti. Zııankestermen kúreste dernásilderdiń ornalasqan jerin ýaqytynda ári naqty taýyp, joıý óte mańyzdy. Shegirtkeniń boljamdy taralý aýqymyn (2,5 mln ga) eskere otyryp, monıtorıng dástúrli ádisterden bólek, drondardyń kómegimen de júrgiziledi. Tájirıbe kórsetkendeı, drondardy qoldaný zııankesterdi baqylaý sharalaryn 5-10 ese jyldamdatady. Sondyqtan, ákimdikterge múmkindiginshe dernásilderdiń ornalasqan jerin anyqtaý úshin drondardy paıdalaný usynylady.
Shekara mańyndaǵy shegirtkege qatysty jaǵdaı únemi qadaǵalanyp otyrady. Shekaralas elderdiń aýyl sharýashylyǵy vedomstvolary arasynda monıtorıng josparlary jasaldy. Atap aıtqanda, ózbek jáne reseılik mamandarmen birlesken zertteýler júrgizilip jatyr.
«Bul jumystardan kútetin jalǵyz nátıjemiz – shegirtkelerdiń taralyp ketpeýi. Sondyqtan, bir apta ishinde shegirtkege qarsy jedel jumys úshin meniń basshylyǵymmen Úkimette ortalyq komıssııa jáne oblystarda ákim orynbasarlary jetekshilik etetin óńirlik komıssııalardy quramyz. Biz qalyptasqan tásilderge súıenbeı, aýmaqtardy muqııat zertteý jáne jerdi óńdeý úshin barlyq qajetti resýrstardy, ásirese adam resýrstaryn qosamyz. Eńbek bırjasynan adamdardy tartyńyzdar. Erteńnen bastap barlyq AShM basshylary qajetti is-sharalardy baqylaý úshin shegirtkeniń taralý qaýpi joǵary aımaqtarǵa barady. Men shegirtkeniń taralý qaýpi tolyǵymen joıylǵanǵa deıin ár apta saıyn jergilikti jaǵdaıdy baqylap, barlyq óńirlerdi tyńdaıtyn bolamyn», — dedi vıtse-premer.
