Serik Jumanǵarın Magnum-ge jarııalanǵan qoǵamdyq boıkot týraly: Bul - bizge úlken sabaq

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilistiń jalpy otyrysynan keıin ótken baspasóz máslıhatynda Magnum saýda jelisine jarııalanǵan qoǵamdyq boıkot týraly pikir bildirdi.

— Áleýmettik jelide klıentten qazaqsha sóıleýdi ótingen tapsyrys jetkizýshiniń jumystan qýylýyna baılanysty Magnum saýda jelisine jarııalanǵan boıkot qatty talqylanyp jatyr. Atalǵan jaǵdaı boıynsha sizdiń ustanymyńyz qandaı, — dep surady jýrnalıst.

Vıtse-premer bul qazaqstandyqtarǵa áleýmettik jelide ár sózge abaı bolý kerektigin kórsetti dep esepteıdi.

— Bul - bar bolǵany jeke adamdardyń arasyndaǵy turmystyq daý. Biraq bizge úlken sabaq boldy. Ondaı til máselelerin, ulttyq máselelerdi talqylaǵanda, áleýmettik jelide jazǵanda abaılaý kerek. Qarapaıym ǵana 20 mln halqymyz bar. Tatý bolýymyz kerek. Qazaqtar aıtady ǵoı «aýyly aralas, qoıy qoralas bolý» kerek. Bizge ne kerek? Qarapaıym, qaradomalaq qazaqtardyń basy aman bolsyn bolashaqta. Odan basqa eshteńe kerek emes. Meniń oıymsha, ol - sheshiletin másele, — degen Serik Jumanǵarın klıentten qazaqsha sóıleýdi talap etkeni úshin jumystan qýylǵan jigit qazir basqa jumys tapqanyn málim etti.

Aıta keteıik, búgin Májilistiń jalpy otyrysynda QQS salynatyn aınalymnyń tómengi shegi 40 mln teńge bolýy múmkin ekeni belgili boldy.