Serik Jumanǵarın kókónis baǵasyn turaqtandyrý úshin óndirýshilermen kelisimshartty aıaqtaýdy tapsyrdy
ASTANA. KAZINFORM – Úkimette vıtse-premer Serik Jumanǵarınniń tóraǵalyǵymen ótken keńeste áleýmettik mańyzy bar azyq-túlik ónimderi baǵasynyń jaǵdaıy talqylandy.
Úkimettiń baspasóz qyzmeti málim etkendeı, ótken aptada ÁMAT baǵasynyń ortasha ındeksi úshinshi apta qatarynan turaqty qalpyn saqtady. Osylaısha, jyl basynan 14 mamyrǵa deıin áleýmettik mańyzy bar azyq-túlik baǵasynyń ósimi 0,3% deńgeıinde qalyp otyr.
Bir apta ishinde qyryqqabattyń ortasha baǵasy 3,6%-ǵa tómendedi, biraq sábiz, kartop jáne pııaz baǵasynyń ósimi jalǵasyp jatyr.
Túrkistan oblysynda qyryqqabattyń alǵashqy ónimin jınalyp jatyr, egistik basyndaǵy satý baǵasy bir kg úshin 20 teńgeden bastalady, dep atap ótti Saýda jáne ıntegratsııa birinshi vıtse-mınıstri Aıjan Bıjanova. Basqa óńirler tarapynan jańa ónimge degen suranys óte tómen. Dese de, sórelerdegi qyryqqabattyń baǵasy kg úshin 154 teńge bolyp otyr. SIM óńirlerge Túrkistan oblysynan jańa pisken kókónis satyp alýdy pysyqtaýǵa shaqyrdy.
Demalys kúnderi Ózbekstannan ımporttalǵan jańa pııazdyń alǵashqy partııalary jetkizilmek. Ózbek kókónisiniń baǵa dıapazony bir kg úshin 62-71 teńge bolmaq. Kelisimsharttarǵa sáıkes alǵashqy jetkizilimder BQO, Qostanaı, Qyzylordaǵa jiberiledi. Jańa ımporttyq egindi jetkizýge ázirge tek 10 aımaq ótinim berdi.
«Barlyq ákimdik kelesi apta ishinde jańa pisken egindi, óz tańdaýlaryńyzben ımporttyq, ıa bolmasa qazaqstandyq óndirýshilerden satyp alý boıynsha barlyq kelisimsharttardyń jumysyn aıaqtańyzdar. Osy arqyly, kókónisterdiń baǵasyn turaqtandyrý qajet», - dep qorytyndylady Serik Jumanǵarın.
