Serik Jumanǵarın: Qytaı — álemdik kóshbasshy, Ortalyq Azııa da — áleýeti mol óńir

ASTANA. KAZINFORM — 2024 jyly Ortalyq Azııa óńiri men Qytaı arasyndaǵy saýda qarqyny 95 mlrd AQSh dollaryna jetken jáne onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetti. Bul týraly Premer-mınıstrdiń orynbasary — ulttyq ekonomıka mınıstri Serik Jumanǵarın elordada «Ortalyq Azııa — Qytaı» iskerlik keńesiniń ekinshi otyrysynda aıtty. 

Onyń aıtýynsha, Ortalyq Azııa elderiniń áleýetin Qytaı Halyq Respýblıkasynyń zor múmkindikterimen biriktirý ózara múdde men seriktestik arhıtektýrasyn buryn-sońdy bolmaǵan deńgeıge kóterýge jol ashady.

− Árıne, mundaı ilgerileýge eń aldymen bizdiń elder basshylary arasyndaǵy shynaıy dostyq pen senimdi qarym-qatynastar yqpal etedi. «Memleket basshylarynyń dıplomatııasy» Ortalyq Azııa men Qytaı arasyndaǵy seriktestikti nyǵaıtatyn kúshke aınaldy. Bizde barlyq baǵyt boıynsha yntymaqtastyqty tereńdete túsýge zor múmkindikter bar. Qytaı shynymen de ekonomıkalyq jáne tehnologııalyq salada álem kóshbasshylarynyń biri sanalady. Qytaı kompanııalary shyǵarǵan ónimder sapasymen, senimdiligimen jáne ınnovatsııalylyǵymen tanymal. Bul el árdaıym progress kóshbasshysy bolyp, tutas álemdegi halyqtardyń ómir súrý sapasyn jaqsartýǵa zor úles qosyp keledi, − dedi Serik Jumanǵarın iskerlik keńestiń ashylýynda.

Ortalyq Azııa da — qarqyndy damyp kele jatqan, úlken damý áleýeti bar óńir, jan-jaqty yntymaqtastyq úshin bar jaǵdaı jasalǵan. Qytaı ınvestorlary qatysqan transulttyq jobalar aımaqtyń ekonomıkalyq ózara baılanys deńgeıin arttyrýǵa yqpal etken.

Búginde Qazaqstan men basqa da Ortalyq Azııa elderinde ekonomıkalyq reformalar júrip jatyr, olar ekijaqty tıimdi kooperatsııaǵa jańa múmkindikter ashady.

− Eń aldymen saýda-ekonomıkalyq yntymaqtastyq — negizgi basymdyǵymyz. Ortalyq Azııa óńiri men Qytaı arasyndaǵy saýda qarqyny óte jyldam ósip keledi. 2024 jyly bul kórsetkish 95 mlrd AQSh dollaryna jetse, onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetti. Bolashaqta biz ekijaqty saýda kólemin eki esege arttyrýdy josparlap otyrmyz. Bul úshin kedergisiz saýdany odan ári damytý jáne iskerlik ortadaǵy tikeleı baılanystardy nyǵaıtý qajet, − dedi Serik Jumanǵarın.

Sonymen birge, elektrondyq kommertsııa saýda qatynastaryna jańa ımpýls berip, taýar men qyzmetti jyldam almasý múmkindigin ashqan.

− QHR tóraǵasynyń bastamasyn qoldap, «Jibek joly elektrondyq kommertsııasynyń pılottyq aımaǵyn» qurý jónindegi jobaǵa qatysýǵa daıyn ekenimizdi rastaımyz. Bizde «Alibaba» jáne «JD.com» elektrondyq platformalarynda ulttyq pavılondar ashý tájirıbesi bar, − dedi mınıstr.

Aıta keteıik, búgin elordada «Ortalyq Azııa — Qytaı» ІІ sammıti ótedi. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysady.

Eń alǵashqy sammıt 2023 jyldyń 19 mamyrda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.