Serik Jumanǵarın QHR Tótenshe jáne Ókiletti elshisi Han Chýnlınmen kezdesti
ASTANA. KAZINFORM - Premer-mınıstrdiń orynbasary – ulttyq ekonomıka mınıstri Serik Jumanǵarın QHR Qazaqstan Respýblıkasyndaǵy Tótenshe jáne Ókiletti Elshisi Han Chýnlınmen kezdesti.
Serik Jumanǵarın dıplomatty jyly qarsy alyp, Qazaqstandaǵy jumysynyń bastalýymen quttyqtady. Ol elshiniń, ásirese, QHR Kommertsııa mınıstrligindegi kóp jyldyq tájirıbesi eki el arasyndaǵy strategııalyq áriptestikti nyǵaıtýǵa qyzmet etetinine senim bildirdi.
«Bizdiń elderimizdiń arasyndaǵy qarym-qatynas senim men strategııalyq áriptestiktiń joǵary deńgeıin kórsetetin sapaly jańa kezeńge jetti. Onyń úzdiksiz nyǵaıýynyń negizgi qozǵaýshy kúshi – eki el kóshbasshylary arasyndaǵy jeke dostyq baılanys. Qazaqstan men Qytaı tatý kórshi, senimdi strategııalyq áriptes. Biz barlyq negizgi ózara is-qımyl baǵytynda kóp qyrly, turaqty jáne tıimdi yntymaqtastyq ornattyq», — dedi vıtse-premer.
Kezdesý barysynda saýda-ekonomıkalyq baılanysty damytýǵa erekshe kóńil bólindi. Qytaı Qazaqstannyń eń iri syrtqy saýda seriktesi bolyp qala bermek. 2024 jylǵy qorytyndy boıynsha Qazaqstan men Qytaı arasyndaǵy taýar aınalymy rekordtyq $43,8 mlrd-qa jetti. Elektrondyq kommertsııany damytýǵa, onyń ishinde Alibaba jáne JD.com platformalarynda Qazaqstannyń ulttyq pavılondaryn ilgeriletýge basa nazar aýdaryldy. YTO Group Express pen Qazposhta arasyndaǵy birlesken pochta jóneltimi kásipornyn qurýdaǵy tabysty yntymaqtastyq týraly atap ótildi.
Máseleniń taǵy bir bóligi qazaqstandyq aýyl sharýashylyǵy ónimin QHR naryǵyna jetkizýdi arttyrýǵa arnaldy. Qatysýshylar astyq tasymaldaý kezinde týyndaıtyn kedergilerdi, qazaqstandyq kásiporyndardy QHR eksporttaýshylary tizilimine engizý, veterınarııalyq, fıtosanıtarııalyq talaptardy kelisý, Qytaıdyń Bas keden basqarmasynyń (BKB) tiziliminde qazaqstandyq elevatorlardy akkredıtteý rásiminiń uzaqqa sozylýy máselesin talqylady. Et ónimi eksportyn ulǵaıtý maqsatynda vıtse-premer qazirgi eksporttyq shekteýdi alyp tastaý úshin óńirlendirý qaǵıdatyn taný múmkindigin qaraýdy usyndy.
«Sıyr eti men shoshqa etin eksporttaýshylardyń kópshiligi Qazaqstannyń soltústik-batys jáne ortalyq oblystary aýmaǵynda ornalasqan. Onda aýsyl boıynsha shekteýler áli de qoldanylady. Aýrý joıylǵannan beri biraq eki jyldan astam ýaqyt ótti. BKB júrgizgen mal sharýashylyǵy kásiporyndarynyń ınspektsııasy men Qazaqstannyń veterınarııalyq qyzmeti aýdıtiniń qorytyndysy boıynsha biz, Qazaqstan qabyldaǵan janýarlardyń aýrýyn óńirlendirý qaǵıdaty sheńberinde, qoldanystaǵy shekteýdi alyp tastaýdy suraımyz. Bul qytaı tarapynyń Qazaqstannyń búkil aýmaǵyna emes, aýsyl aýrýy tirkelgen naqty óńirge ǵana shekteý engizýine múmkindik beredi», — dep atap ótti Serik Jumanǵarın.
Kezdesý qorytyndysynda Han Chýnlın Qytaı men Qazaqstan arasyndaǵy qarym-qatynastyń altyn otyz jyldyǵy jańa kezeńiniń bastalýyna oraı qol jetkizilgen ekijaqty áriptestiktiń joǵary deńgeıin atap ótti. Ol sondaı-aq jańartylatyn energetıka, tsıfrlyq ekonomıka, AÓK jáne elektrondyq saýda salasyndaǵy jobalardy damytýdy qosa alǵanda, eki eldiń ekonomıkalyq yntymaqtastyǵynyń jańa jol kartasy boıynsha birlesip jumys isteýge daıyn ekenin bildirdi.
Aıta keteıik, Qazaqstan sý mamandarynyń alǵashqy toby Qytaıda oqýyn bastady.