Serik Jumanǵarın ınflıatsııany turaqtandyrý máselesi boıynsha keńes ótkizdi

ASTANA. KAZINFORM — Úkimette Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ınflıatsııany turaqtandyrý máseleleri boıynsha kezekti keńes ótti. Keńes barysynda negizgi taýarlar baǵasynyń ózgerý tendentsııalary jáne olardyń ınflıatsııa deńgeıine áseri qaraldy. Bul týraly Úkimet málim etti.

Ulttyq ekonomıka mınıstriniń birinshi orynbasary Azamat Amrınniń aıtýynsha, qazan aıynda aqyly qyzmetterdiń baǵasy 0,8%-ǵa tómendegen. Bul kommýnaldyq qyzmetter tarıfteri men otyn baǵasyn kóterýge moratorııdiń kúshine enýimen baılanysty. Moratorıı 16 qazannan bastap iske qosyldy edi.

— Qazan aıynda jyldyq ınflıatsııa 0,3 paıyzdyq tarmaqqa baıaýlap, 12,6%-dy qurady. Bul kórsetkish qyrkúıek aıynda 12,9% bolǵan. Respýblıkanyń 10 óńirinde ınflıatsııa deńgeıi 10%-dan joǵary boldy. Eń úlken ósim Qaraǵandy (14,2%), Ulytaý (14,2%), Atyraý (13,8%), Aqtóbe (13,5%) oblystarynda, sondaı-aq Shymkent (13,2%) jáne Astana qalasynda (13%) tirkeldi, — dep atap ótti Azamat Amrın.

Qazan aıynda aılyq ınflıatsııa 0,5%-dy qurap, qyrkúıek aıynan tómen boldy. Azyq-túlik ınflıatsııasy 1%, azyq-túliktik emes ınflıatsııa 1,2% boldy.

Barlyq óńirlerde kókónisterdi satyp alý jumystary tolyǵymen aıaqtaldy. Kókónister men sıyr eti baǵalaryn turaqtandyrý maqsatynda Aýyl sharýashylyǵy mınıstrligi men ákimdikter halyqtyń úsh aılyq suranysyna sáıkes satyp alý kólemin 30%-dan 50%-ǵa deıin ulǵaıtty.

Nátıjesinde, negizgi ónimder boıynsha satyp alý kólemi kelesi kórsetkishterge ósti: kartop 117,5 myń tonnadan 146,8 myń tonnaǵa (+25%); sábiz 28,1 myń tonnadan 35,3 myń tonnaǵa (+26,6%); pııaz 21 myń tonnadan 27,4 myń tonnaǵa (+30,4%); qyryqqabat 26,6 myń tonnadan 37,2 myń tonnaǵa (+43,6%); sıyr eti 1,6 myń tonnadan 9,9 myń tonnaǵa, bul bastapqy kólemnen 6,2 ese artyq.

Jıyndy qorytyndylaı kele Serik Jumanǵarın ákimdikter men memlekettik organdarǵa áleýmettik mańyzy bar azyq-túlik ónimderinen bólek, azyq-túlik ınflıatsııasyna áser etetin basqa da taýarlar (qyzanaq, qııar, et farshy, tomat pastasy, balyq jáne basqa da ónimder) baǵalaryn baqylaýdy kúsheıtýdi tapsyrdy. Sonymen qatar otandyq óndirýshilerdiń ónimderine halyqtyń tikeleı qol jetkizýin qamtamasyz etý úshin aýyl sharýashylyǵy jármeńkeleriniń sanyn arttyrý qajettigin atap ótti.

Aıta keteıik, Jumanǵarın ferroqorytpa zaýyttaryna elektr energııasyn tómendetilgen tarıfpen berýdi tapsyrǵan edi.