Jumanǵarın ferroqorytpa zaýyttaryna elektr energııasyn tómendetilgen tarıfpen berýdi tapsyrdy

ASTANA. KAZINFORM – Vıtse-premer – Ulttyq ekonomıka mınıstri Serik Jumanǵarınniń tóraǵalyǵymen ótken ekonomıkalyq ósimdi qamtamasyz etý jónindegi shtabtyń kezekti otyrysynda óńdeý ónerkásibi men qurylys salasynyń dınamıkasy jan-jaqty qaraldy. Bul týraly Úkimettiń baspasóz qyzmeti habarlady.

Toǵyz aıdyń qorytyndysy boıynsha bul baǵyttarda ósim qarqyny jospardan tómen bolǵany atap ótildi. Óńdeý ónerkásibinde mashına jasaý (+14%), hımııa ónerkásibi (+9,6%), qurylys materıaldaryn óndirý (+4,7%), jeńil ónerkásip (+9,4%), rezeńke men plastmassa buıymdaryn shyǵarý (+6,1%), daıyn metall ónimderin óndirý (+15,2%) salalarynda ilgerileý bolǵan.

Qańtar–qyrkúıek aılarynda óńdeý ónerkásibiniń ósimi +6,2% boldy, al on aıdyń qorytyndysy boıynsha ósim shamamen +6,3% deńgeıinde boljanyp otyr. Negizgi baıaýlaý metallýrgııa salasynda baıqalady. Onyń úlesi óńdeý ónerkásibiniń shamamen 40%-y.

Aıta keteıik, 2024 jyly metallýrgııa sońǵy on jyldaǵy eń joǵary kórsetkishke – 6,9% ósimge qol jetkizgen bolatyn. Bul bıylǵy jylǵa joǵary baza qalyptastyrdy. Shtab otyrysynda baıaýlaýdyń sebebi jan-jaqty taldanyp, salanyń ósýin jedeldetý sharalary talqylandy.

Qara metallýrgııadaǵy báseńdeý negizinen ferroqorytpa men bolat óndirýdiń azaıýyna baılanysty. Bes ferroqorytpa zaýytynyń tórteýi bıyl elektr energııasy tarıfteriniń kóterilýine baılanysty óndiris kólemin qysqartqan. Ásirese, Qaraǵandy oblysyndaǵy kásiporyndarda ónim kólemi azaıǵan, bul óńirdiń jalpy óńirlik óniminde 0,9% úleske ıe. Sondaı-aq saladaǵy birqatar kásiporynda júrgizilgen josparly kúrdeli jóndeý jumystary da áserin tıgizdi.

Tústi metallýrgııada ósim qarqynynyń tómendeýi Vasılkov ken ornynda shahtalyq ádiske kóshý jáne qorlardyń sarqylýymen baılanysty.

Serik Jumanǵarın Energetıka mınıstrligine qysqa merzim ishinde qoldanystaǵy qujattarǵa ózgerister engizý múmkindigin pysyqtap, ferroqorytpa zaýyttaryna tómendetilgen tarıf boıynsha elektr energııasyn berýdi qarastyrýdy tapsyrdy.

Toǵyz aıdyń qorytyndysy boıynsha mashına jasaý salasy 14% ósim kórsetti. Salaǵa jańa serpin Astana Motors Manufacturing Kazakhstan zaýytynda jeńil avtokólik óndirisiniń iske qosylýy arqyly berilmek.

Hımııa ónerkásibi de turaqty ósimin saqtap otyr – 9,6%. Bul ósim ammofos (+55,4%), ammıak selıtrasy (+14,5%), natrıı tsıanıdi (+5,4%), polıpropılen (+50,5%), sary fosfor (+12,6%) jáne kúkirt qyshqyly (+7,3%) óndirisiniń artýy esebinen qamtamasyz etildi.

Bıylǵy qurylys jumystarynyń eń úlken úlesi kólik ınfraqurylymyna tıesili – 21,3% (joldar men avtomagıstraldar, temirjol jáne metro, kópirler men tonnelder qurylysy). Ónerkásiptik nysandar úlesi – 20,5% (sýmen qamtý, káriz júıeleri men turǵyn úı qurylysy). Gaz qubyrlary, elektr berý jelileri jáne jylý jelilerin salý jobalary shamamen 5,6%.

Sala ósiminiń qarqyny joǵary deńgeıde saqtalyp otyr: toǵyz aıda +14,9%, on aıdyń qorytyndysy boıynsha +15,2%.

Serik Jumanǵarın toǵyz aı qorytyndysy boıynsha qurylys qarqyny tómendegen óńirlerdiń ákim orynbasarlarynyń baıandamasyn tyńdap, árbir ónerkásip nysany men qurylysty turaqty baqylaýda ustaýdy tapsyrdy. Qıyndyqtar týyndaǵan jaǵdaıda, másele jedel túrde shtabtyń qaraýyna shyǵarylýy tıis dedi.

Aıta keteıik, Qazaqstandaǵy elektr energııasyn berý jelilerin tekserý júıesine ózgeris engiziledi. Bul týraly Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi.