Serik Jumanǵarın: Eń tómengi jalaqyny kóterýge tyrysamyz, ýaqyty keldi
ASTANA. KAZINFORM — Úkimet otyrysynan keıingi brıfıngte Premer-mınıstrdiń orynbasary — Ulttyq ekonomıka mınıstri Serik Jumanǵarın eń tómengi jalaqyny kóterý máselesi 2027-2028 jyldarǵa shegerilgenin túsindirdi.
— Qarjyǵa baılanysty. Qazir ǵana birqatar suraqqa jaýap bergende atap óttim. Biraz reforma — salyq reformasy, qarjylyq reforma bastaldy. Birinshiden — qarjylyq turaqtandyrý. Kelesi jylǵy ımplementatsııanyń qalaı bolatynyn qaraý kerek. Eń aldymen salyqty qalaı jınaımyz? Ekinshiden, naryqtaǵy ishki jáne syrtqy jaǵdaı qalaı bolady? Sol sebepti 1-jartyjyldyqta 2027-2029 jyldarǵa arnalǵan jańa bıýdjette osy máseleni qarastyramyz. Árıne, ony sheshýge, kóterýge tyrysamyz. Sebebi ýaqyty keldi. Biraq, qalaı, qanshaǵa kóteretinimizdi reforma qorytyndysy kórsetedi, — dedi vıtse-premer BAQ ókilderiniń saýalyna oraı.
Aıta keteıik, búgingi otyrysta makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Serik Jumanǵarın 2027-2028 jyldary eń tómengi jalaqyny kóterý máselesi qaralatynyn aıtqan edi.
Sonymen qatar Premer-mınıstrdiń orynbasary — Ulttyq ekonomıka mınıstri Serik Jumanǵarın jańa jyl aldynda azyq-túlik baǵasy qalaı qubylatyny týraly pikir bildirdi.