Serik Jumanǵarın eń tómengi jalaqy mólsherin kóterý bastamasyna jaýap berdi
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın eń tómengi jalaqy mólsherin 100 myń teńgeden asyrý týraly usynysqa jaýap berdi.
— 2026 jylǵa arnalǵan maqsatty transfertterden bas tartyldy. Bul rette Ulttyq qor qosymsha 2,4 trln qosymsha qarajat alady. Degenmen, ony qazir jumsap, eń tómengi jalaqyny kótere alar edik. Biraq munymen qandaı nátıje alamyz? Meniń oıymsha, qazir baza jasap, soǵan súıene otyryp kórsetkishterdiń barlyǵyn odan ári kóterý kerek, — dedi S. Jumanǵarın Májilistiń jalpy otyrysynan keıin tilshiler suraǵyna jaýap bere otyryp.
Onyń aıtýynsha, qazir eń tómengi jalaqyny kóterý máselesi kún tártibinde tur.
— Menińshe, eń tómengi jalaqyny jáne jalpy jalaqy deńgeıin arttyrý bastamasy is júzinde oryndalatyn kún alys emes. Bul máseleler árqashan bizdiń nazarymyzda. Árıne, halyqqa jaqsy jańalyqty jarııalap jiberýge bolady, biraq qysqa merzimge úzilis jasaıyq, óıtkeni qazirgi qubylmaly jaǵdaıdy eskerý kerek. Atap aıtqanda, obektıvti jáne turaqty múmkindik paıda bolǵan kezde, ony birden júzege asyramyz, — dedi mınıstr.
Budan buryn habarlanǵandaı, búgin Májilistiń jalpy otyrysynda «2026 — 2028 jyldarǵa arnalǵan respýblıkalyq bıýdjet týraly» zańy qaraldy. Osy oraıda Májilistiń Qarjy jáne bıýdjet komıtetiniń qorytyndysynda eń tómengi jalaqynyń mólsherin kóterý usynylǵan.