Serik Jumanǵarın: Ekonomıkany boljaýǵa biryńǵaı zııatkerlik model qajet
ASTANA. KAZINFORM – Premer-mınıstrdiń orynbasary-ulttyq ekonomıka mınıstri Serik Jumanǵarın «01.AI» kompanııasynyń bas dırektory Kaı-Fý Lımen kezdesti. Taraptar makroekonomıkalyq boljaý jáne memlekettik apparattyń tıimdiligin arttyrý úshin JI paıdalaný perspektıvasyn talqylady.
Serik Jumanǵarın dástúrli tásilderdi qoldaný kezinde syrtqy faktorlardyń tym qubylmalylyǵy esepteýdi qıyndatatynyn atap ótti.
— Biz úshin boljamdaýdyń sapaly bolýy jáne ekonomıkalyq jaǵdaıdyń ózgerýin erterek anyqtaý óte mańyzdy. Standartty boljamdar árqashan naryqqa sáıkes kele bermeıdi. Eger buryn taldama bir aıǵa nemese bir jylǵa jasalsa, búginde ıkemdi baǵalaý kúndelikti qajet. Bizge keshendi stsenarıılik taldaý úshin biryńǵaı zııatkerlik model kerek, — dedi vıtse-premer.
Kezdesýde sóz sóılegen «01.AI» kompanııasynyń basshysy Kaı-Fý Lıdiń aıtýynsha, jasandy ıntellekt buryn-sońdy bolmaǵan qarqynmen damyp jatyr. Jyl sanap ol anaǵurlym myqty ári qoljetimdi bolyp otyr. Onyń aıtýynsha, jasandy ıntellekt adamǵa kóp ýaqytty qajet etetin tapsyrmalardy birneshe mınýt ishinde oryndaı alady.
Ol memlekettik organdar úshin jasandy ıntellektti kúndelikti protsesterdi avtomattandyrý úshin ǵana emes, sonymen qatar strategııalyq sheshimderdi qoldaý quraly retinde paıdalaný mańyzdy ekenin atap ótti. Kaı-Fý Lıdiń pikirinshe, JI tehnologııalary ekonomıkalyq damýdy boljaýǵa, ártúrli stsenarıılerdi modeldeýge, memlekettik basqarýdyń tıimdiligin arttyrýǵa, táýekelderdi azaıtýǵa jáne sheshim qabyldaý protsesin jaqsartýǵa kómektesedi.
Ol memlekettik organdardyń basshylyǵy deńgeıinde jasandy ıntellektti engizý qajettiligine erekshe nazar aýdardy. Óıtkeni dál osy tásil tehnologııanyń áleýetin barynsha ashýǵa múmkindik beredi.
Kaı-Fý Lı sonymen qatar JI-diń keń taralýy álemdik ekonomıkaǵa aıtarlyqtaı áser etetinin, ekonomıkalyq ósýdi jedeldetip, eńbek naryǵyn, bilim berý júıesin jáne memlekettik saıasatty beıimdeýdi talap etetinin atap ótti. Osyǵan baılanysty ol Qazaqstannyń jasandy ıntellekt pen tsıfrlyq tehnologııalardy damytýǵa kóńil bóletinin joǵary baǵalady.
Kezdesý barysynda Ulttyq ekonomıka mınıstrligi úshin tsıfrlyq sheshimder usynyldy. Olardyń ishinde 27 memlekettik organnyń derekteri negizinde táýekelderdi avtomatty túrde baǵalaıtyn jáne tekserýler tizimin qalyptastyratyn bıznesti tekserýdi avtomattandyrý júıesi, sondaı-aq naqty ýaqyt rejıminde negizgi makroekonomıkalyq faktorlardyń ekonomıkaǵa áserin taldaıtyn ekonomıkalyq ósýdi boljaý platformasy bar.
Kezdesý qorytyndysy boıynsha taraptar Qazaqstannyń ekonomıkalyq saıasatynyń boljamdylyǵy men turaqtylyǵyn qamtamasyz etý úshin jasandy ıntellekt algorıtmderin damytý boıynsha birlesken jumysty jalǵastyrýǵa kelisti.
Aıta ketelik Premer-mınıstrdiń orynbasary — ulttyq ekonomıka mınıstri Serik Jumanǵarın Islam damý bankiniń prezıdenti doktor Muhammed ál-Djassermen kezdesý ótkizgen edi.
