Serik Jumanǵarın EEK keńesiniń 2026 jylǵy alǵashqy otyrysyn ashty
ASTANA.KAZINFORM - Bıyl Qazaqstan Eýrazııalyq ekonomıkalyq odaqqa tóraǵalyq etip jatyr. Máskeýde ótken Eýrazııalyq ekonomıkalyq komıssııa keńesiniń bıylǵy alǵashqy otyrysyn asha otyryp, Serik Jumanǵarın Keńes músheleri men baıqaýshy elderdiń ókilderine arnap sóz sóılep, Qazaqstan tóraǵalyǵynyń negizgi basymdyqtaryn atap ótti. Bul týraly Úkimettiń baspasóz qyzmeti habarlady.
– Qazaqstan Prezıdenti memleket basshylaryna joldaǵan úndeýinde EAEO aıasyndaǵy ortaq jumysymyzdyń basym baǵyttaryn aıqyndady. 2026 jyly ekonomıkanyń túrli salalarynda jasandy ıntellekt quraldaryn engizýge, Odaqtyń logıstıkalyq áleýetin tıimdi paıdalanýǵa, ónerkásip pen agroónerkásip keshenin tsıfrlandyrýǵa, ózara saýdadaǵy kedergilerdi joıýǵa, sondaı-aq úshinshi eldermen saýda-ekonomıkalyq yntymaqtastyqty damytýǵa basa nazar aýdarý usynylady, — dedi ol.
Sonymen qatar ortaq protsesterdi tolyq kólemde júzege asyrýdyń mańyzdylyǵy erekshe ataldy. Qazirgi tańda bekitilgen 77 ortaq protsestiń tek 42-si ǵana naqty júzege asyrylǵan. Ýákiletti organdardyń aqparattyq júıeleri ózara ıntegratsııalanbaı, Odaq ishinde taýarlardyń erkin qozǵalysyn qamtamasyz etý qıyn.
Basym baǵyttardyń biri retinde «kedergisiz» tranzıt ataldy. Bul navıgatsııalyq plombalardy keń kólemde qoldanýdy, biryńǵaı tranzıttik deklaratsııany engizýdi jáne kedendik bajdardy tóleýdi qamtamasyz etýdiń birizdendirilgen tetikterin paıdalanýdy kózdeıdi. Atalǵan sharalar tasymaldyń jyldamdyǵy men qunyna tikeleı áser etedi.
Sondaı-aq kooperatsııalyq jobalardy damytýǵa aıryqsha kóńil bólinbek. Qazirgi ýaqytta Qazaqstan, Qyrǵyzstan, Belarýs jáne Reseı kompanııalarynyń qatysýymen bes kooperatsııalyq joba maquldanǵan. Negizgi mindet – kooperatsııa qorjynyn keńeıtý, birlesken óndiristi ulǵaıtý, jańa jumys oryndaryn ashý jáne lokalızatsııalaý deńgeıin arttyrý.
Ótkizý naryqtaryn keńeıtý maqsatynda úshinshi eldermen saýda kelisimderin kezeń-kezeńimen ilgeriletý usynyldy. Bul kelisimder EAEO-ǵa múshe memleketterdiń bıznesi úshin turaqty ósýdiń negizgi kózderiniń biri retinde qarastyrylady.
Aıta keteıik, EAEO elektrondy kommertsııaǵa biryńǵaı ereje engizedi.