Serik Jumanǵarın Dúnıejúzilik bankpen jańa ınvestıtsııalyq jobalardy talqylady
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Vashıngtonda Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Antonella Bassanımen jáne Dúnıejúzilik bank tobynyń ókilderimen kezdesti. Bul týraly Úkimettiń baspasóz qyzmeti habarlady.
Kezdesý qazaqstandyq delegatsııanyń AQSh-qa sapary sheńberinde josparlanǵan Qazaqstannyń ınvestıtsııalyq múmkindiginiń tusaýkeserine daıyndyq aıasynda ótti.
Kezdesý barysynda Qazaqstannyń senim, kásipqoılyq jáne turaqty damýdyń ortaq mindettemesine negizdelgen qalyptasqan strategııalyq áriptestikti joǵary baǵalaıtyny atap ótildi. 1993-2026 jyldar aralyǵyndaǵy yntymaqtastyq sheńberinde kólik, bilim berý, ekologııa, «jasyl» tehnologııa men tsıfrlandyrý salasynda $8 mlrd-tan asa somaǵa 50-den astam joba júzege asyryldy.
Taraptar bıylǵy mamyrda josparlanǵan ınfraqurylymdyq saladaǵy ınvestıtsııalyq baǵdarlamany talqylaýdy qosqanda, yntymaqtastyqty odan ári keńeıtýge ázirligin rastady.
Aıta keteıik, Senat Dúnıejúzilik bank qarajatyna qatysty qujatty maquldady.
