Serik Jumanǵarın benzın baǵasy jóninde: ákimshilik ádistermen kúresý qıyn
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın AI-92 markaly benzın men dızel otyny baǵasyn odan ári kóterýge moratorıı engizilýine qatysty túsinik berdi.
- Benzınge de, dızelge de baǵanyń kúrt ósýine jol bermedik. Aıyna shamamen 2 teńgege ósirdi. Qazir naryqtaǵy jaǵdaıdy baǵalaý úshin ýaqytsha moratorıı qabyldandy. Reseı men Ýkraına arasyndaǵy qaqtyǵys saldarynan kórshi elde munaı ónimderiniń baǵasy kúrt ósip jatqanyn bilesizder. Qazaqstanda baǵa aıtarlyqtaı tómen. Sondyqtan túrli syltaý, shemalarmen janar-jaǵarmaıymyzdy shetelge tasymaldaý qaýpi bar. Munymen ákimshilik ádistermen kúresý qıyn, - dedi S. Jumanǵarın Májilistiń jalpy otyrysynan keıin tilshiler suraǵyna jaýap bere otyryp.
Onyń aıtýynsha, Qazaqstannyń ózi munaı óndirýine qaramastan, syrtqy áserden tolyq oqshaýlana almaıdy.
- Biz aralda emespiz. Munaıymyzdy óndirip, ózimizdi janar-jaǵarmaımen qamtamasyz ete alamyz. Biraq EAEO-da kedendik shekaranyń joqtyǵynan munaı ónimderiniń kórshiles elderge aǵynyn tejeý qıyn. Sondyqtan biz jaǵdaıdy ýaqytsha baqylaýǵa alý jóninde sheshim qabyldadyq», - dedi mınıstr.
Aıta keteıik, taıaýda Úkimet benzın men tarıf baǵasyna moratorıı engizilip, ıpoteka kólemi ulǵaıtý sheshimin jarııa etken bolatyn.
Sonymen qatar Energetıka mınıstri Erlan Aqkenjenov keler jyly benzın baǵasynyń kúrt ósýine jol berilmeıtinin aıtty.