Serik Jumanǵarın: Baılar kóbirek salyq tóleýge tıis

ASTANA. KAZINFORM – Buryn salyq zańnamasyn óreskel buzǵan quryltaıshylar men kompanııa basshylaryna jańa kompanııa qurýǵa tyıym salynýy múmkin. Premer-mınıstrdiń orynbasary – Ulttyq ekonomıka mınıstri Serik Jumanǵarın Salyq kodeksiniń jańa redaktsııasyna osyndaı norma engizýdi usyndy.

- Bıznesti bólshekteýmen kúresti kúsheıtý úshin zańdy tulǵalardy tirkeýge qatysty ózgerister usynylady. Quryltaıshylary nemese basshylary buryn aýyr salyqtyq buzýshylyqtar úshin jaýapqa tartylǵan kompanııalar jańa zańdy tulǵany tirkeı almaıdy, - dedi vıtse-premer.

Sondaı-aq, ol kodekstiń jańa jobasy salyq organdarynyń kúshin eń táýekeli joǵary jaǵdaılarǵa baǵyttaıtynyn aıtady.

- Usynylǵan salyq reformasy óz kiristerin jasyratyn adal emes salyq tóleýshilerge, sondaı-aq salyq salýdyń ádilettiligin arttyrýǵa baǵyttalǵan. Baılar kóbirek tóleýi tıis, - dedi mınıstr.

Aıta ketý kerek, Salyq kodeksiniń jańa redaktsııasynda QQS salynatyn aınalymnyń tómengi shegin 40 mln teńge dep belgileý usynylyp otyr.