Serik Jumanǵarın balamaly salyq rejımi qaı munaı kenishterine qoldanylatynyn aıtty
ASTANA. KAZINFORM – Senat depýtattary Salyq kodeksiniń jańa redaktsııasyn birinshi oqylymda talqylap jatyr.
Talqylaý kezinde Premer-mınıstrdiń orynbasary – Ulttyq ekonomıka mınıstri Serik Jumanǵarınge paıdaly qazba baılyq ıgerýshilerdiń jekelegen sanatyna nege balamaly salyq rejımi qoldanylatynyn surady.
Vıtse-premer bul rejım keni taýsylyp bara jatqan munaı kenishterin barynsha sarqyp ıgerý úshin engiziletinin eske saldy.
- Qazba baılyqtar ıgerý boıynsha balamaly salyqqa kelsek, Kaspıı shelfinde tereńdigi 4 shaqyrymnan asatyn ken oryndaryn paıdalanatyn kásiporyndarǵa arnaıy mehanızmdi qoldadyq. Qazirgi tańda «Teńiz», «Qashaǵan», Qarashyǵanaq» jobalaryn eseptemesek, búkil shıkizat óńdeý kóleminiń turaqty túrde tómendeýi baıqalyp otyr. Bul birinshi ınvestıtsııalyq tsıkldiń aıaqtalýyna baılanysty. Sol sebepten jańa mehanızmder kerek. Mysaly, Qyzylorda oblysynda sońǵy 10-15 jylynda munaı óndirý kólemi 5 ese azaıǵan. Qazir Mańǵystaý oblysyn da osyndaı jaǵdaı kútip tur. Tek geologııalyq qıyndyqtarmen baılanysty emes, qordyń sarqylýymen, kenishtiń sýlanýymen de baılanysty. Bul kenishti ıgerýshilerdiń moınynda áleýmettik mindettemeleri bar. Erteń toqtap qalsa óńirdiń áleýmettik jaǵdaıyna qatty áser etedi. Sondyqtan sarqylyp bara jatqan ken oryndaryndaǵy óndiristi jalǵastyrý úshin osyndaı balamaly salyq rejımi usynylyp otyr, - dedi ol.
Sondaı-aq, ol atalǵan rejım qaı jobalarǵa qoldanylatynyn atady.
- Onyń óziniń sıpattamasy bar. Bul – jańa ınstıtýt. Qazir qandaı ken oryndary bar? Olar – Ózenmunaıgaz, Mańǵystaýmunaıgaz, Qalamqas, Aqtóbemunaıgaz, Keıqııaq ústindegi tuzdy qabat, PetroQazaqstan Qumkól, Torǵaı-Petrolıým, Embimunaıgaz, Balǵymbaev, Jańatalap, Joldybaı, Maqat, Qulsary t.b ken oryndarynyń bárine qoldaý jasalady, - dedi Serik Jumanǵarın.
Buǵan deıin ádette ár aptanyń beısenbi kúni ótetin Senattyń jalpy otyrysy osy aptada dúısenbige aýystyrylǵanyn jazǵan edik. Osylaısha senatorlar aptany Májilis qabyldaǵan Salyq kodeksiniń jańa redaktsııasy men birqatar zańdy talqylaýdan bastap ketti.