Serik Jumanǵarın azyq-túlik baǵasyn tıimsiz retteıtin óńirlerdiń jumysyn synǵa aldy

ASTANA. KAZINFORM - Qazaqstan Respýblıkasy Premer-mınıstriniń orynbasary – ulttyq ekonomıka mınıstri Serik Jumanǵarın jumys keńesin ótkizip, áleýmettik mańyzy bar azyq-túlik taýarlary baǵasynyń qazirgi jaǵdaıyn talqylady.

Saýda jáne ıntegratsııa mınıstrliginiń málimetteri boıynsha, osy jyldyń aqpan aıynda áleýmettik mańyzy bar taýarlar (ÁMAT) baǵasynyń ósý ındeksi 1,3%-ǵa deıin baıaýlaǵan. Sonymen qatar bes taýar túri: kúrish (-2,9%), jumyrtqa (-1,4%), un (-0,8%), makaron ónimi (-0,4%) jáne qaraqumyq (-0,2%) boıynsha baǵa tómendedi. Jyl basynan beri kókóniske baǵanyń maýsymdyq ósýi baıqalýda.

Óńirlerde qordaǵy ónimderdi satý jumysy júrip jatyr. Aýyl sharýashylyǵy vıtse-mınıstri Erbol Tasjúrekov 156,9 myń tonna jalpy kókónis qorynyń 53,9 myń tonnasy satylǵanyn, qazirgi sátte 92,5 myń tonna kókónis qory qalǵanyn habarlady.

«Júrgizilgen túgendeýlerden keıin qoımalardaǵy kartop qory 47,6 myń tonnany, sábiz – 16 myń tonnany, pııaz – 14,6 myń tonnany, qyryqqabat – 14,1 myń tonnany qurap otyr», — dep málimdedi Erbol Tasjúrekov.

Aýyl sharýashylyǵy vıtse-mınıstriniń aıtýynsha, bul qorlardy satý jumystary jalǵasýda.

Vıtse-premer naryqqa ónimderdi az jetkizgen, áleýmettik mańyzy bar azyq-túlik baǵasyn tıimsiz retteıtin óńirlerdiń jumysyn synǵa aldy. Atap aıtqanda, elordanyń iri saýda jelileriniń birinde aqpan aıynda kartop jetkizý keshiktirilgeni baıqaldy, osyǵan baılanysty Saýda komıteti men «QTJ Ekspress» AQ kómegimen atalǵan kókónisti jedel jetkizý jumysy uıymdastyryldy.

Serik Jumanǵarın basqa óńirlerde mundaı jaǵdaılardyń aldyn alý úshin kartop jáne áleýmettik mańyzy bar ózge de taýarlar qoryna tekseris júrgizýdi tapsyrdy.

Turaqtandyrý qorlaryndaǵy ónimdi satý, maýsymaralyq kezeńniń bastalýyna baılanysty jekelegen aımaqtarda ımporttalǵan kartopty jetkizý bastaldy. Sonymen qatar aýmaqtyq saýda departamentteri ÁMAT-qa saýda ústemesin baqylaý boıynsha júıeli jumys júrgizip keledi.

Jyl basynan beri jáne 27 aqpandaǵy jaǵdaı boıynsha 842 saýda nysany saýda ústemesin asyrǵany úshin ákimshilik jaýapkershilikke tartyldy.

Osyǵan deıin azyq-túlik baǵasyn qoldan kótergen 4 myńnan astam kásipker jazalanǵany týraly jazdyq.