Serik Jumanǵarın «Atamekenniń» QQS-dan túsetin kiris týraly esebine jaýap berdi

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilis otyrysynan keıin ótken baspasóz máslıhatynda «Atameken» ulttyq kásipkerler palatasynyń QQS-ny ózgertýden túsetin kiris týraly esebine jaýap berdi.

— «Atameken» ulttyq kásipkerler palatasy qosylǵan qun salyǵynyń mejelerin ózgertýden bıýdjetke ary ketse 3 trln teńge ǵana túsedi degen esep aıtty. Al Úkimet 4-5 trln teńge túsedi dep otyr. Erteń kásipkerler palatasynyń esebi ras bolyp, qosymsha kiris 3 trln teńge ǵana bolsa, qalǵan 2 trln teńgeni taǵy Ulttyq qordan alasyzdar ma, — dep surady jýrnalıst.

Serik Jumanǵarın «Atamekenniń» esebinen biraz qate tabylǵanyn, keıin palata ókilderi Úkimettiń ýájderimen keliskenin aıtty.

— Jalpy aıtqanda, «Atamekenniń» eseptegeni — tek QQS-dan túsetin aqsha. Bizdiń eseptegenimiz búkil salyq reformasynan túsetin aqsha bolatyn. Bul reformada bankterge, oıyn-saýyq nysandaryna qosymsha júktemeler bar. Onyń syrtynda kóptegen jeńildikti alyp tastaımyz dep otyrmyz. Sonyń bárin eseptegende 4,5-5 trln teńge qosymsha kiris bolady. Meniń bilýimshe, dál qazir «Atameken» men bizdiń esebimizde eshqandaı aıyrmashylyq joq, — dedi vıtse-premer.

Ulttyq ekonomıka mınıstri «Atameken» UKP-nyń bastapqy esebi keıin ózgertýge ushyraǵanyn aıtty.

— «Atamekenniń» birinshi esebine qaraǵanda, arasynda qatelikter kóp boldy. Sosyn biz olardy túzetip, ekinshi esebin ákelgende eki jaqtyń boljamy jaqyndady, — dedi Serik Jumanǵarın.

Eske salsaq, Atameken» ulttyq kásipkerler palatasynyń tóralqa tóraǵasy Raıymbek Batalov qosylǵan qun salyǵyn kóterýden túsetin kiristiń Úkimet kútkendeı kólemde bolmaýy múmkin ekenin aıtqan edi.