Serik Jumanǵarın amerıkalyq bıznes úshin perspektıvaly salalardy atady
ASTANA. KAZINFORM – Qazaqstan men AQSh iskerlik dóńgelek ústeli barysynda Qazaqstan Respýblıkasy Premer-mınıstriniń orynbasary – Ulttyq ekonomıka mınıstri Serik Jumanǵarın amerıkalyq seriktestermen uzaq merzimdi yntymaqtastyqty nyǵaıtýǵa múmkindik beretin birqatar perspektıvaly baǵytty atady.
Mınıstrdiń aıtýynsha, birinshi kezekte shıkizatty tereń óńdeý salasynyń áleýeti joǵary. Qazaqstannyń metall, kómirsýtek jáne aýyl sharýashylyǵy ónimderiniń qory mys, alıýmınıı, temir, sırek jer metaldary, munaı-hımııa, munaı óńdeý, kómir hımııasy jáne bıdaı óńdeý baǵyttarynda aýqymdy múmkindikter usynyp otyr. Bul sektordaǵy yqtımal jobalardyń jalpy kólemi shamamen 95 mlrd AQSh dollaryna baǵalanady.
Sondaı-aq ımportty almastyrý baǵytyna erekshe nazar aýdarylyp otyr. Serik Jumanǵarın ımport kólemi 50 paıyzdan asatyn jáne jergiliktendirý ekonomıkalyq turǵydan tıimdi salalar anyqtalǵanyn aıtty.
- Qazirgi tańda jalpy quny 20 mlrd AQSh dollarynan asatyn júzdegen joba qalyptastyrylǵan. Olardyń basym bóligin memlekettik qoldaýsyz iske asyrýǵa múmkindik bar,- dedi mınıstr.
Budan bólek, Serik Jumanǵarın ınfraqurylym salasynda da iri jobalar qarastyrylǵanyn atap ótti.
- Ulttyq ınvestıtsııalyq jospar aıasynda jalpy quny 80 mlrd AQSh dollaryna jýyq 200-den astam joba iske asyrylmaq. Al energetıka jáne kommýnaldyq sektordy jańǵyrtý baǵdarlamasy aıasynda elektr energııasyn óndirý men jelilerdi damytýǵa qosymsha 25 mlrd AQSh dollary baǵyttalady, - dedi ol.
Sonymen qatar mınıstr eksportqa baǵdarlanǵan ónerkásiptik jobalardy júzege asyrýǵa múddeli jetekshi halyqaralyq kompanııalarmen yntymaqtastyqty damytýǵa daıyn ekenin jetkizdi.
Buǵan deıin Qazaqstan men AQSh bıznesi jańa seriktestikke qadam basatynyn jazǵanbyz.
