Serik Jumanǵarın áleýmettik mańyzy bar azyq-túlik baǵasyn turaqtandyrý boıynsha jıyn ótkizdi
ASTANA. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarın áleýmettik mańyzy bar azyq-túlik taýarlarynyń (ÁMAT) baǵasyn turaqtandyrý máselesi boıynsha keńes ótkizdi.
Ulttyq statıstıka bıýrosynyń málimetinshe, bıylǵy qańtar aıynda Qazaqstandaǵy jyldyq ınflıatsııa deńgeıi 8,9%-dy qurady. Baǵa dınamıkasyna azyq-túlikke jatpaıtyn taýarlar men aqyly qyzmetter áser etti. Azyq-túlikke jatpaıtyn taýarlardyń jyldyq ósimi 8,4%-ǵa, al qyzmet kórsetý baǵasy 13,8%-ǵa kóterildi.
Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, sońǵy aptada ÁMAT baǵasynyń ındeksi 0,3%-ǵa, jyl basynan beri 2,2%-ǵa ósti. Bul kókónisterdiń maýsymdyq qymbattaýyna (qyryqqabat, sábiz, pııaz) baılanysty. Sondaı-aq sıyr eti (1,2%) men kúnbaǵys maıy (1,1%) baǵasynyń óskeni tirkeldi. Jyl basynan bastap 11 aqpan aralyǵynda eń joǵary ósimi Ulytaý (4,8%), Aqtóbe (3,8%) jáne Shyǵys Qazaqstan (2,7%) oblystarynda baıqaldy.
Baǵany retteý maqsatynda aımaqtardaǵy turaqtandyrý qorlarynan ónimderdi saýdaǵa shyǵarý jalǵastyp jatyr. Aýyl sharýashylyǵy vıtse-mınıstri Erbol Tasjúrekovtiń aıtýynsha, jalpy qalyptasqan 156,9 myń tonna qordan tek 45,4 myń tonna kókónis satyldy. Keıbir oblystarda kókónisti satý qarqyny belgilengen kólemnen tómen, bul baǵanyń ósýine ákelýde. Máselen, Abaı oblysynda 2,8 myń tonna kartoptyń tek 486 tonnasy ǵana satylyp, nátıjesinde baǵa 24,2%-ǵa qymbattaǵan. Keıbir óńirlerde sábiz, qyryqqabat jáne pııaz baǵasyna qatysty osyndaı jaǵdaı baıqalady.
Sondaı-aq ol ákimdikterdiń málimetinshe, qańtardyń sońynda qosalqy sharýashylyqtardaǵy qordy esepke almaǵanda, kartop qory 327 myń tonnany quraǵanyn aıtty. Al, 23 qańtar men 14 aqpan aralyǵynda halyqtyń tutyný kórsetkishi 73,5 myń tonna kóleminde boldy.
«Jeke qosalqy sharýashylyqty eseptemegende, 253,5 myń tonna kartop qory 2025 jyldyń erte pisetin ónimin alǵanǵa deıin halyqtyń ishki qajettiligin tolyq jabýǵa múmkindik beredi», — dedi Erbol Tasjúrekov.
Serik Jumanǵarın keńeske qatysýshylardyń nazaryn azyq-túlik baǵasyn turaqtandyrýǵa baǵyttalǵan sharalardy jedeldetý qajettigine aýdardy. Negizgi maqsat – turaqtandyrý qorlarynan ónimderdi jedel shyǵarý jáne óńirler men megapolısterde apta saıynǵy jármeńkelerdi ótkizý.
«Baǵanyń aýytqýy men satýdaǵy qandaı bolmasyn shekteýlerdi boldyrmaý úshin turaqtandyrý pýnktterindegi ónim baǵasyndaǵy aıyrmashylyqty joıý qajet. Sondaı-aq kommýnaldyq bazarlar men saýda jelilerimen tyǵyz jumys isteý kerek. Aqpan-naýryz aılarynda turaqtandyrý qorlaryndaǵy ónimderdi satý jáne sáýir aıynda jańa kókónisterdi jetkizýdi qamtamasyz etý qajet. Bul aýyl sharýashylyǵy mınıstrligi men saýda jáne ıntegratsııa mınıstrliginiń maýsymaralyq kezeńde áleýmettik azyq-túlik baǵasynyń turaqtylyǵyn saqtaý úshin óńirlermen birlesip sheshetin basty mindetteri», — dep túıindedi Serik Jumanǵarın.
Aıta keteıik, buǵan deıin SQO-da azyq-túlik baǵasy bir jylda qalaı ózgergenin jazdyq.