Serik Jumanǵarın AQSh-tyń baj saıasaty týraly: bolmasa basqa naryqtardy izdeımiz

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilistiń jalpy otyrysynan keıin ótken baspasóz máslıhatynda AQSh-tyń Qazaqstan eksportyna engizgen baj mólsherlemesi týraly pikir bildirdi. 

— Bul oqıǵada biz aqparat alyp qana otyrǵan tarappyz. Ázirge biz eshkimge qarymta baj engizý máselesin qarastyryp otyrǵan joqpyz. Bizge qarsy engizilgen bajdardyń kóp bóligi jumys istemeıdi. Óıtkeni biz usynatyn taýarlar erekshe tizimde. Qazaqstan shıkizat taýarlary boıynsha Eýropa men Amerıka elderi úshin senimdi jetkizýshi bolyp esepteledi. Ýran, shıki munaı, kúmis, kómirtegi deńgeıi joǵary ferrohrom — erekshe tizimdegi taýarlar. Engizilgen bajdyń ol taýarlarǵa yqpaly joq, — dedi Serik Jumanǵarın.

Onyń aıtýynsha, AQSh-tyń Qazaqstan eksportyna engizgen baj mólsherlemesi eki aradaǵy alys-beriske 5 paıyz kóleminde ǵana áser etedi.

— Áseri taýarlardyń 5 paıyzyna ǵana, shamamen 100 mln dollardyń eksportyna ǵana áser etedi. Qaraý kerek, biz usynatyn baǵa jańa bajǵa tótep bere me, naryq qanshalyqty ıkemdi, marja mólsherin qanshaǵa túsirýge týra keledi. Bolmaǵan jaǵdaıda ketip, basqa naryqtardy izdeýge týra keledi, — dedi ol.

Aıta keteıik, búgin Májilistiń jalpy otyrysynda QQS salynatyn aınalymnyń tómengi shegi 40 mln teńge bolýy múmkin ekeni belgili boldy.