Serik Jumanǵarın AQSh saýda palatasymen jáne iri amerıkalyq kompanııa ókilderimen kezdesti
ASTANA. KAZINFORM - Qazaqstan Premer-mınıstriniń orynbasary – Ulttyq ekonomıka mınıstri Serik Jumanǵarın AQSh saýda palatasynyń Taıaý Shyǵys, Túrkııa jáne Ortalyq Azııa boıynsha aǵa vıtse-prezıdenti Hýsh Choksınmen, sondaı-aq Chevron, Meta, Apple, Coca Cola, Mastercard, Amway kompanııalarynyń ókilderimen kezdesti. Bul týraly Úkimettiń baspasóz qyzmeti habarlady.
Kelissózder barysynda vıtse-premer Amerıka Qurama Shtattarynyń Qazaqstannyń negizgi saýda-ekonomıkalyq áriptesteriniń biri ekenin atap ótip, ekijaqty yntymaqtastyqty damytý eldiń syrtqy ekonomıkalyq saıasatynyń basym baǵyty ekenin jetkizdi.
– Ótken jyly eki el arasyndaǵy ózara saýda kólemi $4,2 mlrd-qa jetti. Biz aldaǵy ýaqytta taýar aınalymyn ulǵaıtý úshin aıtarlyqtaı áleýet bar ekenin kórip otyrmyz, - dep atap ótti Serik Jumanǵarın.
Qazirgi tańda amerıkalyq bıznes Qazaqstanda keńinen jumys istep jatyr. Elde AQSh kapıtalynyń qatysýymen 700-den astam kásiporyn qyzmet atqaryp jatyr, al 2005 jyldan beri tikeleı ınvestıtsııalar kólemi $51 mlrdtan asty. Іri ınvestorlardyń qatarynda Chevron, ExxonMobil, Pfizer, General Electric, Wabtec jáne basqa da kompanııalar bar. Olar munaı-gaz, farmatsevtıka, energetıka jáne mashına jasaý salalarynyń damýyna zor úles qosyp otyr. Bul derekter amerıkalyq áriptesterdiń Qazaqstandaǵy ınvestıtsııalyq saıasatqa senimin jáne strategııalyq áriptestiktiń turaqtylyǵyn kórsetedi.
Kezdesý barysynda yntymaqtastyqty odan ári tereńdetý máseleleri talqylandy.Amerıkalyq tarap jańa salyq kodeksiniń normalary, zańnamany jetildirý, týrızmdi damytý, saýdadaǵy kedergilerdi azaıtý jáne ózge de taqyryptardy kóterdi. Barlyq suraqqa mazmundy túsiniktemeler berildi.
Jıyndy qorytyndylaı kele, Serik Jumanǵarın jobalardy júzege asyrýdyń barlyq kezeńinde ınvestorlarmen tikeleı dıalogtyń erekshe mańyzyn atap ótti.
Ol amerıkalyq áriptesterdi Qazaqstannyń múmkindikterin bıznesti damytýda keńinen paıdalanýǵa shaqyryp, serpindi bastamalardy birlesip iske asyrýǵa daıyn ekenin bildirdi.
Aıta keteıik, Tıantszınde Qazaqstan bıznesiniń jańa ókildigi ashyldy.