Serik Jumanǵarın AQSh kongressmenderimen kezdesti
ASTANA. KAZINFORM – Vashıngtonǵa sapary sheńberinde Qazaqstannyń vıtse-premeri – Ulttyq ekonomıka mınıstri Serik Jumanǵarın AQSh Kongresi múshelerimen birqatar kezdesý ótkizdi. Bul týraly Úkimettiń baspasóz qyzmeti habarlady.
Kongressmen, bıýdjet jáne salyq komıtetiniń múshesi, «Qazaqstan – AQSh» kokýsynyń teń tóraǵasy Djımmı Panettamen kelissózder barysynda taraptar ekijaqty saýda men ekonomıkalyq yntymaqtastyqty damytý máselesin talqylady.
Serik Jumanǵarın kongressmenge Djekson-Venık túzetýiniń kúshin joıý týraly máseleni ilgeriletýde Qazaqstandy qoldaǵany úshin alǵys bildirip, bul máseleni AQSh Kongresinde tezirek retteýge úmit bildirdi.
Vıtse-premer Qazaqstan ınvestıtsııaǵa jáne bıznes júrgizýge turaqty jáne ádettegideı alań bolyp qala beretinin atap ótti. Ol qyrkúıekte Nıý-Iorkte Qazaqstan Prezıdenti amerıkalyq bıznespen bastaǵan dıalogty jalǵastyrý sheńberinde AQSh Saýda palatasynyń ókilderimen kezdesýler týraly habardar etti. Qazaqstanda amerıkalyq ýnıversıtetterdiń qatysýyn keńeıtý máselesine erekshe nazar aýdaryldy. Búginde Qazaqstanda 30-ǵa jýyq sheteldik joǵary oqý orny bar. Onyń ekeýi – amerıkalyq. Elimiz álemniń jetekshi bilim berý ortalyqtarymen áriptestikke árdaıym daıyn.
Prezıdent Ákimshiligi basshysynyń orynbasary Erbolat Dosaevpen birge Serik Jumanǵarın kongressmen Kerol Devaın Mıllermen de kezdesti. Taraptar Qazaqstan men AQSh arasyndaǵy, onyń ishinde energetıka, jasandy ıntellekt, tsıfrlandyrý jáne basqa da saladaǵy ekonomıkalyq qatynastardy damytýdyń mańyzyna basa nazar aýdardy. Erbolat Dosaev Qazaqstannyń jańa tehnologııalyq ekonomıkany qalyptastyrý jáne AQSh-tyń Ortalyq Azııadaǵy basty áriptesi retindegi rólin nyǵaıtý jónindegi kózqarasyn bildirdi.
Kerol Mıller yntymaqtastyqty damytýdyń bolashaq urpaq úshin mańyzdylyǵyn atap ótip, ony odan ári nyǵaıtýǵa kómektesýge daıyn ekenin jetkizdi.
Sondaı-aq Qazaqstannyń vıtse-premeri bıýdjet jáne salyq komıtetiniń múshesi, kongressmen Tomas Sýozzımen kezdesýde Djekson-Venık túzetýin joıý týraly máseleni talqylady. Aıta ketý kerek, kezdesýlerde barlyq kongressmen Qazaqstanǵa osy baǵytta qoldaý kórsetýge daıyn ekenin rastady.
- Biz saparymyzdy Memleket basshysynyń Nıý-Iorkte bastaǵan dıalogynyń jalǵasy retinde qarastyramyz jáne bul kezdesýler Qazaqstan men Amerıka Qurama Shtattary arasyndaǵy yntymaqtastyqqa jańa serpin beretinine senimdimiz, - dep atap ótti Serik Jumanǵarın.
Aıta keteıik, Qanat Bozymbaev Ońtústik Koreıada Alatau City jobasyn tanystyrdy.