Serik Jarasbaev: Qazaqstanda para hokkeıdiń damýyna barlyq jaǵdaı jasalǵan

ASTANA. KAZINFORM – QR Týrızm jáne sport vıtse-mınıstri Serik Jarasbaev Qazaqstandaǵy para hokkeı sportynyń damýy jaıly aıtty. 

Ol Qazaqstanda para hokkeı sportynyń damýy joǵary deńgeıde ekenin atap ótti. 

– Para hokkeıden Qazaqstan quramasy turaqty túrde halqaralyq jarystarǵa qatysyp keledi. Onyń ishinde búgingi ótip jatqan para hokkeıden (B-pýl) álem chempıonaty bar. Ótken jyly, otandastarymyz elimizde ótken osy básekede jaqsy óner kórsetti. Sheteldegi halqaralyq jarystardada atoı salyp júr. Sol sebepti, halqaralyq uıymdar bizge nazaryn aýdaryp, osyndaı joǵary deńgeıdegi jarystardy elimizde ótkizýge múmkindik berip otyr, - deıdi vıtse-mınıstr.

Serik Jarasbaev sonymen qatar elimizde para hokkeı sportynyń damýyna barlyq jaǵdaı jasalǵanyn aıtty.

– Memleket basshysynyń qoldaýynyń arqasynda, mınıstrlik pen ulttyq federatsııa 5 jyl buryn juıeli jumystar atqara bastady. Elimizde bul sporttyń damýyna barynsha jaǵdaı jasalǵan. Búgingi ótip jatqan álem chempıonaty mınıstrliktiń qoldaýymen joǵary deńgeıde ótip jatyr, - dedi ol.

Aıta keterligi, Qazaqstan quramasy búgin 19:00-de alǵashqy oıynyn Shvetsarııaǵa qarsy ótkizedi.

Osyǵan deıin habarlaǵanymyzdaı, elordadaǵy týrnır aınalmaly júıe formatynda ótedi. Jarystyń qortyndysy boıynsha alǵashqy eki oryndy ıelengen komandalar A tobyna ótse, sońǵy oryn alǵan qurama C tobyna túsedi.

Sondaı-aq Astanada ótetin bul birinshilikte Mılan — 2026 XIV qysqy Paralımpıada oıyndaryna irikteý týrnırine beriletin eki joldama sarapqa salynady. Іrikteý jarysy 2025 jyldyń 5-10 qarashasy aralyǵynda Norvegııanyń Iessheım qalasynda ótedi. Bul jarysta Paralımpıadaǵa tikeleı joldama alatyn quramalar anyqtalady.