Serik Shápkenov Jylyoı aýdanyndaǵy jaǵdaıdy baqylaýǵa aldy

ATYRAÝ. KAZINFORM – Atyraý oblysynyń ákimi Jylyoı aýdanyna baryp, tasqyn sýǵa qarsy jumysty baqylaýǵa aldy.

Búgin, 4 sáýirde Jylyoı aýdanynda tótenshe jaǵdaı engizilgen edi. Osy aýdandaǵy Qaraǵaı aýylyna sý kiriip, 156 turǵyn evakýatsııalandy.

Aýdan ortalyǵy – Qulsary qalasynan Maqat aýdany arqyly Atyraýǵa qatynaıtyn joldyń bir bóligin sý basty. Sol sebepten, Qulsary qalasy men Maqat aýdanyndaǵy Dossor kenti aralyǵyndaǵy jol bóligi jabylyp, kólik qatynasy tolyq toqtady. 

Oblys ákimi Serik Shápkenov Qulsary qalasy men jaqyn mańdaǵy eldi mekenderdi tasqyn sýdan qorǵaý jumysymen tanysty. Sodan keıin jedel shtabtyń jıynyn ótkizdi.

«Aýdanda bóget salý jumysyna tehnıka sanyn kóbeıtip, ár ýcheskede kezekshilik uıymdastyrý kerek. Eldi mekenderdi tasqyn sýdan qorǵaıtyn bóget salý jumystaryn kúsheıtken jón. ⁠Sý tasqynyna qarsy jumystarǵa jumyldyrylǵandardy janar-jaǵarmaımen, qajetti qural-jabdyqpen jáne tamaqpen qamtý qajet», - dep tapsyrma berdi Serik Shápkenov.

Eske sala ketelik, budan buryn Jylyoı aýdanynda Jem ózeniniń sýy 2 metr 53 sm-ge kóterilgenin jazǵan edik.

Qulsary qalasyndaǵy kópir ýaqytsha jabyldy.

Búgin Atyraý oblysynyń taǵy bir aýdanynda tótenshe jaǵdaı jarııalanǵan edi. 

Keıin Qulsarydan Dossorǵa deıingi joldyń bir bóligin sý basqanyn jazǵan edik. Sondaı-aq Atyraý polıtseıleri Qaraǵaı aýylyndaǵy úılerdi táýlik boıy baqylaýǵa aldy.