Serik Shápkenov Qulsarydaǵy sý basqan úılerdi baǵalaýdy eki aptada aıaqtaýdy tapsyrdy

ATYRAÝ. KAZINFORM – Atyraý oblysynyń ákimi Serik Shápkenov Qulsary qalasynda tasqyn sý basqan úılerdi tehnıkalyq baǵalaýdy eki aptada aıaqtaýdy tapsyrdy.

Ákimniń aıtýynsha, Qulsary qalasyndaǵy turǵyn úılerge tasqyn sýdan keltirilgen zalal tolyq kólemde óteledi. 

«Sý basqan úılerge keltirilgen zalaldy anyqtaý úshin tehnıkalyq tekserý jáne baǵalaýdy eki aptada aıaqtaý qajet. Úılerdi abattandyrý jumystary bastalǵannan keıin turǵyndardyń usynys-pikiri eskeriledi. Eger turǵyndar úılerin óz qalaýymen jóndegisi kelse, zııannyń mólsherine baılanysty qarajat tolyq kólemde beriledi. Baspanasy jaramsyz dep tanylǵan turǵyndar úshin sol orynǵa, ne ózderi tańdaǵan jerde tıptik joba boıynsha úı salynady. Nemese shyǵyn kólemine qaraı turǵyn úı satyp alynyp beriledi», - dedi Serik Shápkenov.

Onyń aıtýyna qaraǵanda, Qulsary qalasynyń barlyq zardap shekken turǵynyna kómek kórsetilgenge deıin jedel shtab jumysyn toqtatpaıdy. 

«Qazir Jaıyq ózeninde sý kóterilip jatyr. Mundaǵy jaǵdaı turaqtalǵan soń, Qulsary qalasynda qalpyna keltirý jumystaryn tekserý úshin aýdanǵa apta saıyn kelemin»,- dedi Serik Shápkenov.

Eske sala ketelik, buǵan deıin Qulsaryda tasqyn sý basqan 867 úıge tehnıkalyq tekserý júrgizilgen edi. 

Sondaı-aq, Qulsary qalasynan bir kúnde 975 tonna qoqys qaldyǵy shyǵaryldy.