Serik Shápkenov «Atyraý-Inder» tas jolynyń sapasyna kóńili tolmaıtynyn aıtty

ATYRAÝ. KAZINFORM – Atyraý oblysynyń ákimi Serik Shápkenov Inder aýdanyndaǵy jol qurylysyna kóńil tolmaıtynyn aıtty. Bes kún buryn bul aýdandy basqarǵan Daryn Shamuratov oblys ákiminiń orynbasary bolyp taǵaıyndalǵan edi. 

Serik Shápkenov Inder aýdanynyń turǵyndarymen kezdesýde «Atyraý-Inder» tas jolynyń qurylysy kóńil kónshitpeıtininin jetkizdi. 

«Osy aýdanǵa kele jatqanda arnaıy toqtap, «Atyraý-Inder» tas jolynyń jaǵdaıyn kórdim. Júk kólikteriniń kesirinen jol asfalty buzylǵan. Bul jolmen ózimiz kúnde qatynaımyz. Sondyqtan joldy kútip ustaý qajet edi. Tas jol boıyndaǵy qaýipsizdikti qamtamasyz etý úshin arnaıy baqylaý kamerasy bar polıtsııa kólikteriniń sanyn kóbeıtemiz. Tas joldyń osy aýdanǵa qarasty 50 shaqyrym bóliginde ortasha jóndeý jumysy júrip jatyr. Biraq merdigerdiń josyqsyzdyǵynan qurylys qarqyny baıaý. Turǵyndar jumysty kórmegenin, joldyń sharshatqanyn aıtyp otyr. Infraqurylymdy damytý, joldyń sapasy – basty nazardaǵy másele. Jaýapty basshylarǵa tıisti tapsyrma berdim. Qajet bolsa, merdigermen kelisimshartty úzý úshin qajetti sharalardy qabyldaý kerek», - dedi Serik Shápkenov. 

Turǵyndar aýyz sýmen qamtý, baspana berý, jol salý jáne basqa da áleýmettik máselelerdi kóterdi. Ákimniń pikirinshe, bul máselelerdi ózektiligine baılanysty kezeń-kezeńimen sheshý josparlanǵan. 

Eske sala ketelik, buǵan deıin Daryn Shamuratov Atyraý oblysy ákiminiń orynbasary bolyp taǵaıyndalǵanyn jazǵan edik.