Serik Sápıev jańa qyzmetine kiristi
QARAǴANDY. KAZINFORM — Ataqty boksshy, Olımpıada chempıony jáne Vel Barker kýbogynyń ıegeri Serik Sápıev Qaraǵandy oblysynyń dene shynyqtyrý jáne sport basqarmasy basshysynyń mindetterin oryndaýǵa kiristi, dep habarlaıdy Kazinform agenttiginiń tilshisi.
Onyń kandıdatýrasyn QR Týrızm jáne sport mınıstrliginde arnaıy komıssııa keliskennen keıin taǵaıyndaý týraly ókimge aımaq basshysy Ermaǵanbet Bólekpaev qol qoıdy.
Jańa basshyny sport qoǵamdastyǵyna oblys ákiminiń orynbasary Oraz Táýirbekov tanystyrdy.
— Memlekettik qyzmet isteri agenttiginiń jáne týrızm jáne sport mınıstrliginiń kelisimi boıynsha Serik Jumanǵalıuly Sápıev Qaraǵandy oblysynyń dene shynyqtyrý jáne sport basqarmasynyń basshysy bolyp konkýrstan tys taǵaıyndaldy. Onyń tájirıbelik daǵdylary men bilimi jańa laýazymdaǵy áleýetin ashýǵa kómektesedi dep senemiz, — dedi Oraz Táýirbekov.
Oblys ákiminiń orynbasary basqarmanyń burynǵy basshysy Temirhan Abylaevqa atqarylǵan jumystary úshin alǵysyn bildirdi.
Serik Sápıev oǵan senim artqany úshin alǵysyn bildirip, oblysta sportty damytýǵa bar kúsh-jigerin salatynyn jetkizdi.
— Memleket basshysy aıtqandaı, bıliktiń vertıkaly qurylýy tıis. Alda nazar aýdarýdy qajet etetin sport túrleri eskeriletin jańa zań qabyldanady. Qaraǵandy sportynyń tarıhy keń, ári dańqy zor. Jetekshi pozıtsııamyzdy qaıtarý kerek. Meniń óz josparlarym, ıdeıalarym bar. Týǵan jerimdi sportqa beıim etkim keledi. Aldymen men barlyq vedomstvolyq baǵynysty uıymdardy tyńdap, olarmen kezdespekshimin. Sodan soń aımaqtardy aralaımyn. Kezdesý qorytyndysy boıynsha sheshim qabyldaımyz, — dedi Serik Sápıev.
Serik Sápıevtiń birneshe biliktilik boıynsha joǵary bilimi bar: «dene shynyqtyrý pedagogi», «quqyqtaný», «memlekettik jáne jergilikti basqarý», «sport menedjmenti» mamandyǵy boıynsha «Bolashaq» halyqaralyq baǵdarlamasynyń stıpendıaty.
Eńbek jolyn Qazaqstan boks federatsııasynda bastady: jattyqtyrýshy-oqytýshy, keıin sport dırektory boldy.
«Astana Arlans» kásibı sport klýbyn basqardy.
2017 jyly QR Parlamenti Májilisiniń depýtaty bolyp saılandy.
2019 jyldyń qańtarynda Memlekettik qyzmetke aýysty — úsh jylǵa jýyq QR Mádenıet jáne sport mınıstrliginiń Sport jáne dene shynyqtyrý isteri komıtetin basqardy.
Sodan keıin QR Ulttyq Olımpıada komıteti Bas hatshysynyń orynbasary qyzmetin atqardy.
2022 jyldyń sáýirinen bastap osy taǵaıyndaýǵa deıin «MTEX management» JShS sportty damytý jónindegi basqarýshy dırektory bolyp jumys istedi, QR Ulttyq Olımpıada komıtetiniń vıtse-prezıdenti bolyp tabylady.
Esterińizge sala keteıik, Astanada QR Týrızm jáne sport mınıstri Erbol Myrzabosynovtyń tóraǵalyǵymen óńirlik sport basqarmalarynyń basshylaryn taǵaıyndaý jónindegi komıssııanyń otyrysy ótti. Onda Serik Sápıevtiń Qaraǵandy oblysy dene shynyqtyrý jáne sport basqarmasynyń basshysy laýazymyna kandıdatýrasy qaraldy.