Serik Sápıev jańa qyzmetke usynyldy
ASTANA. KAZINFORM - London Olımpıadasynyń chempıony Serik Sápıev Qaraǵandy oblystyq dene shynyqtyrý jáne sport basqarmasynyń basshysy bolady. Bul týraly Týrızm jáne sport mınıstrligi habarlady.
Astanada QR Týrızm jáne sport mınıstri Erbol Myrzabosynovtyń tóraǵalyǵymen óńirlik sport basqarmalarynyń basshysyn taǵaıyndaý boıynsha komıssııa otyrysy ótti. Otyrysta Qaraǵandy jáne Pavlodar oblystarynyń dene shynyqtyrý jáne sport basqarmalarynyń basshylyǵyna usynylǵan eki úmitkerdiń kandıdatýrasy qarastyryldy.
Atap aıtqanda, Qaraǵandy oblystyq dene shynyqtyrý jáne sport basqarmasynyń basshylyǵyna bokstan London Olımpıadasynyń chempıony Serik Sápıevtiń, al Pavlodar oblystyq dene shynyqtyrý jáne sport basqarmasynyń basshylyǵyna QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Azamat Imashevtyń kandıdatýrasy usynylyp, komıssııa músheleri kelisimin berdi.
Jıyn barysynda komıssııa músheleri úmitkerlerdiń saladaǵy tájirıbesi men óńir sportyn damytýǵa qatysty josparyna, sondaı-aq sport ǵylymynyń negizderi men menedjmentin meńgergendigi jóninde suraqtar qoıdy.
«Memleket basshysy Qasym-Jomart Toqaev HHHІІІ jazǵy Olımpıada júldegerlerimen kezdesýinde árbir óńir qandaı sport túrin damytý kerektigine qatysty sheshimdi derbes qabyldaıtynyn synǵa alǵan bolatyn. Osyǵan oraı, Prezıdent sport salasyndaǵy barlyq deńgeıdegi basqarý vertıkalin qalpyna keltirý jóninde Úkimetke naqty tapsyrma berdi. Endi oblystyq sport basqarmalarynyń basshylyǵyna usynylǵan úmitkerler QR Týrızm jáne sport mınıstrligi janynan qurylǵan komıssııanyń kelisimimen júzege asyrylady», — dedi Erbol Myrzabosynov.
Aıta keteıik, kandıdattardy jergilikti atqarýshy organ usynady jáne Týrızm jáne sport mınıstrligi janynan qurylǵan komıssııanyń oń qorytyndysyn alǵan kandıdattardy ǵana taǵaıyndaýǵa tıis.