Serik Sápıev jańa qyzmetke taǵaıyndaldy
ASTANA. KAZINFORM – Serik Sápıev Týrızm jáne sport mınıstriniń shtattan tys keńesshisi bolyp taǵaıyndaldy.
Serik Sapıev Qazaqstan Respýblıkasynyń týrızm jáne sport mınıstriniń shtattan tys keńesshisi – jazǵy XX Azııa oıyndaryna daıyndyq shtabynyń sporttyq blogynyń úılestirýshisi bolyp taǵaıyndaldy. Bul sheshim bıylǵy jyly kúshine engen «Dene shynyqtyrý jáne sport týraly» zańnyń jańa redaktsııasynda kózdelgen rotatsııa júıesi aıasynda qabyldandy.
Serik Sápıev — bokstan London Olımpıadasynyń chempıony, 2010 jyly Gýanchjoý qalasynda ótken jazǵy Azııa oıyndarynyń jeńimpazy. Buǵan deıin QR Parlamenti Májilisiniń depýtaty, QR Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy, óńirlik basqarma basshysy qyzmetterin atqarǵan. Qazirgi tańda ol Qazaqstan Respýblıkasynyń Ulttyq sýrdlımpıadalyq komıtetiniń prezıdenti.
Shtab quramyna Týrızm jáne sport mınıstrliginiń ókilderi, ulttyq sport federatsııalarynyń jetekshileri jáne sport salasynyń ardagerleri endi. Olar daıyndyqtyń árbir kezeńin pysyqtap, qoıylǵan mindetterdiń ýaqtyly ári sapaly oryndalýyn qamtamasyz etedi.
Aıta keteıik, bıylǵy jazǵy Azııa oıyndary 19 qyrkúıek pen 4 qazan aralyǵynda Japonııanyń Aıchı jáne Nagoıa qalalarynda ótedi. Azıada-2026 baǵdarlamasyna 41 sport túri engen. Jalpy 68 baǵdarlama boıynsha 460 júlde jıyntyǵy sarapqa salynady. Onyń 217-si erler arasynda, 204-i áıelder arasynda, al 39-y aralas sanatta oınatylady. Baǵdarlamaǵa olımpıadalyq, olımpıadalyq emes jáne dástúrli azııalyq sport túrleri engen.
Aıta ketelik Serik Sápıev Qaraǵandydaǵy rezonansty oqıǵadan keıin qyzmetinen ketken edi.