Serik Sápıev pen Qanat Islam Qazaqstan boks federatsııasynda qyzmetke keldi

Bul jóninde Qazaqstan boks federatsııasy málim etti.

Olımpıada chempıony Serik Sápıev Qazaqstan boks federatsııasy prezıdentiniń keńesshisi qyzmetine taǵaıyndaldy.

Serik Jumanǵalıuly Sápıev 1983 jyly dúnıege kelgen. Bokstan Olımpıada oıyndarynyń jeńimpazy, eki dúrkin álem jáne Azııa chempıony, QR Eńbek sińirgen sport sheberi. Vel Barker Kýboginiń ıegeri.

Qazaqstan boks federatsııasy prezıdentiniń boksty damytý jónindegi keńesshisi qyzmetinde Serik Sápıev boks quramalarynyń nátıjesin jaqsartý, sport túrin damytý boıynsha júıeli jumys pen Olımpıada oıyndaryndaǵy joǵary jetistik jolynda qyzmet atqarady.

Sondaı-aq Qanat Islam bokstan 19 jasqa deıingi Qazaqstan jastar quramasynyń úılestirýshisi boldy.

1984 jyly dúnıege kelgen. Kásipqoı boksshy, WBA FedeCaribe tujyrymynyń chempıony áýesqoı boksta Qytaı quramasynyń sapynda Beıjiń Olımpıadasy, álem chempıonaty jáne Azııa Oıyndarynyń qola júldegeri atandy.

2010 jyldan bastap Qazaqstan azamaty bolǵan ol «Astana arlandary» kásipqoı klýby sapynda oıyn kórsetti. Kásipqoı boksta 30 jekpe-jek ótkizip, onyń 22-sinde nokaýtpen jeńiske jetken.
Qanat Islam budan bylaı otandyq boksta jastar quramasynyń jumysyn úılestirip, álemdik arenadaǵy nátıjeni jaqsartýǵa úles qospaq.

Eske salsaq, budan buryn bokstan Qazaqstan erler quramasy Azııa chempıonatyna daıyndyǵyn bastady.