Serik Sápıev orynbasarymen bolǵan janjalǵa núkte qoıdy

ASTANA. KAZINFORM – Olımpıada chempıony, memlekettik qyzmetker Serik Sápıev áleýmettik jeliler men BAQ-ta qyzý talqylanǵan orynbasarymen baılanysty jaǵdaıǵa qatysty resmı pikir bildirdi. Ol bul máseleniń tolyq qaralyp, sheshilgenin málimdedi.

Serik Sápıev memlekettik qyzmetshi retinde ádep normalaryn qatań saqtaıtynyn jáne qandaı da bir arandatýshylyqqa ermeıtinin aıtady.

– Áleýmettik jeliler men buqaralyq aqparat quraldarynda tarap jatqan jaǵdaıǵa baılanysty jaýap bereıin dep sheshtim. Men memlekettik qyzmetshi retinde óz mindetimdi atqarý barysynda memlekettik qyzmetshiniń ádep qaǵıdattaryn qatań saqtaımyn. Bala kezimnen bapkerlerim maǵan sharshy alańnan tys jerlerde kúsh qoldanýǵa bolmaıtynyn úıretken. Árbir is-áreketim úshin jaýapkershilik arqalaıtynymdy tolyq túsinemin. Sondyqtan qandaı da bir arandatýshylyqqa ermeımin. Másele tolyq qaralyp, jabyq dep esepteledi, – dedi Serik Sápıev.

Olımpıada chempıony óz sózinde kúsh qoldaný sport arenasymen shektelýi tıis ekenin, al memlekettik qyzmette sabyr men jaýapkershilik birinshi orynda turatynyn jetkizdi.

Aıta keteıik, buǵan deıin áleýmettik jelilerde Serik Sápıev pen onyń orynbasaryna qatysty túrli boljam taraǵan bolatyn. Resmı túsiniktemeden keıin atalǵan jaǵdaı aıaqtalǵan is retinde qarastyrylyp otyr.