Serik Sápıev mıllıon dollarlyq usynystan bas tartty
ASTANA. KAZINFORM – London Olımpıadasynyń chempıony, qazaqstandyq boksshy Serik Sápıev kásipqoı boksqa aýysý úshin usynylǵan bir mıllıon dollardan ne sebepti bas tartqanyn túsindirdi. Bul týraly ol «Sport Mix podkast» YouTube arnasyna bergen suhbatynda aıtty., dep habarlaıdy INFORMSPORTS.
Sápıevtiń sózinshe, qomaqty qarjy týraly usynys Gennadıı Golovkınniń jekpe-jegine barǵan kezde jasalǵan. Sol jerde Serhıo Martınespen baılanysy bar promoýter qazaqstandyq boksshymen kelisimshart jasasý úshin bir mıllıon dollar tóleýge daıyn ekenin jetkizgen.
Alaıda Sápıev aǵylshyn tilin bilmegendikten, usynysty birden túsinbegen. Promoýter ketip qalǵan soń ǵana onyń aıtqan sózderin aýdaryp bergen.
Olımpıada chempıony sol ýaqytta aqsha tabýdy basty maqsat etpegenin atap ótti. Óıtkeni ol sporttyq mansabyn aıaqtap, Qazaqstan boks federatsııasynda qyzmet atqaryp, keıin «Astana Arlans» klýbyn basqarǵan.
— Ol kezde aqsha tabý týraly kóp oılaǵan joqpyn. Bokstan ketkenime bir jarym jyldaı ýaqyt bolǵan edi. Eger kásipqoı boksqa aýyssam, Olımpıadadaǵydaı deńgeıde óner kórsete almaımyn dep oıladym. Árıne, sporttyq babymdy qaıta jınaýǵa bolatyn shyǵar. Biraq sol kezde burynǵy deńgeıimdi kórsete almaıtyn bolsam, kásipqoı boksqa barýdyń qajeti qansha degen oı boldy, — dedi Sápıev.
Aıta keteıik, Serik Sápıev 2012 jyly London Olımpıadasynda altyn medal jeńip alyp, týrnırdiń eń tehnıkalyq sheber boksshysyna beriletin Vel Barker kýbogyn ıelengen.
Sondaı-aq ol eki dúrkin álem chempıony (2005, 2007), eki dúrkin Azııa chempıony (2007, 2009) jáne 2010 jylǵy Azııa oıyndarynyń jeńimpazy atanǵan.
Sápıev 2012 jyldyń jeltoqsanynda sporttyq mansabyn aıaqtaǵan. Onyń aıtýynsha, mıllıon dollarlyq usynystan bas tartýyna qarjydan góri óziniń sporttyq deńgeıin saqtap qalýǵa degen umtylysy áser etken.
Aıta ketelik Álimhanuly men Banktiń tıtýldyq jekpe-jeginiń ótetin orny men ýaqyty naqtylanǵan edi.
