Serik Sápıev Qazaqstandaǵy legıoner sportshylarǵa qatysty pikir bildirdi

ASTANA. KAZINFORM – London Olımpıadasynyń chempıony Serik Sápıev álemdik dodalarda elimizdiń namysyn qorǵaıtyn sheteldik sportshylardy satyp alýǵa qatysty oıyn aıtty. 

«Legıonerler boıynsha bul ár memlekette bar praktıka. Ár elde legıonerlerge kóńili kónshimeıtinder tabylady. Árıne, óz sportshylarymyzdy daıyndaýymyz kerek. Qajet jaǵdaıda shetelden tájirıbeli jattyqtyrýshylardy tartyp, olardan úırenip, óz sportshylarymyzdy daıarlaý qajet», - dedi Serik Sápıev elordada Parıj Olımpıadasynyń bokstan kúmis júldegeri Nurbek Oralbaıdy qarsy alý sátinde BAQ ókilderiniń saýalyna jaýap bere turyp.

Aıta keteıik, London Olımpıadasynyń chempıony Serik Sápıev Parıj Olımpıadasyna qazaq boksshylaryn arnaıy qoldap barǵany týraly habarlaǵan edik.

Búgin tańerteń astanalyqtar Olımpıada júldegeri Nurbek Oralbaıdy qarsy aldy. Elorda áýejaıyna boksshynyń jaqyndary, jankúıerler jáne BAQ ókilderi jınaldy.