Serik Sápıev Qaraǵandydaǵy rezonansty oqıǵadan keıin qyzmetinen ketti
QARAǴANDY. KAZINFORM — Serik Sápıevtiń qatysýymen bolǵan rezonansty oqıǵa, oǵan baılanysty sotqa deıingi tergep-tekserý kadrlyq sheshimdermen aıaqtaldy.
Qoǵamdyq talqylaý, qyzmettik tekserý jáne sport salasyndaǵy basqarý júıesine júrgizilgen aýdıt aıasynda Qaraǵandy oblysy ákimdiginde Sápıev pen onyń orynbasary atqaryp otyrǵan laýazymdarynan ketkenin habarlady.
Eske salsaq, Qaraǵandy oblysy polıtsııa departamentiniń málimetinshe, eki er adam arasynda aldymen kelispeýshilik týyndap, ol keıinnen tóbelespen aıaqtalǵan.
Oqıǵaǵa baılanysty Serik Sápıev áleýmettik jelidegi paraqshasynda keńeıtilgen pikir jarııalady. Ol atalǵan jaǵdaıdyń jeke nemese turmystyq sıpatta emestigin atap ótti.
Atalǵan janjal qoǵamdyq rezonans týdyryp, quqyq qorǵaý organdarynyń tergep-tekserý nysanyna aınaldy. Óńirdegi sportty basqarý júıesinde yqtımal zańbuzýshylyqtar jónindegi málimdemelerge baılanysty qyzmettik tekserý men keshendi aýdıt taǵaıyndaldy.
Búgin Qaraǵandy oblysy ákimdigi Serik Sápıev pen onyń orynbasary qyzmetten ketkenin resmı túrde rastady.
— Qaraǵandy oblysynyń dene shynyqtyrý jáne sport basqarmasynda basqarma basshysy Serik Sápıev pen onyń orynbasary Daýren Esimhanov óz erkimen atqaryp otyrǵan qyzmetterinen bosatyldy, — delingen resmı habarlamada.