Qazaqstan men Koreıa eńbek kóshi-qony júıesinde yntymaqtastyqty damytýdy talqylady
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Vıktorııa Shegaı Koreıadan kelgen delegattardy Qazaqstandy Employment Permit System (EPS) júıesine engizý úshin irikteýdiń ekinshi kezeńi aıasynda júrgizilip jatqan jumystardyń barysymen tanystyrdy.
Eńbekmıni baspasóz qyzmetiniń málimetinshe, delegatsııa quramyna Koreıa Respýblıkasynyń jumyspen qamtý jáne eńbek, syrtqy ister, ádilet mınıstrlikteriniń ókilderi, sondaı-aq Adamı resýrstardy damytý jónindegi koreı qyzmetiniń ókilderi kirdi.
Ońtústik Koreıa ókilderi irikteý rásiminde kózdelgen beıindi nysandardy aralap, qoldanystaǵy ınfraqurylymmen, protsesterdi uıymdastyrýmen jáne tıisti mekemelerdiń jumys isteý jaǵdaılarymen tanysty. Sonymen qatar olar kandıdattardy irikteý jáne daıarlaý protsesterinde paıdalanylatyn medıtsınalyq uıymdarǵa, oqý jáne testileý alańdaryna bardy. Delegatsııaǵa rásimderdi uıymdastyrýdyń qoldanystaǵy tetikteri, ınfraqurylymdyq múmkindikter jáne atalǵan nysandardyń jumys isteýiniń praktıkalyq aspektileri usynyldy.
Budan bólek, ınspektsııalaý barysynda taraptar nysandardyń belgilengen talaptarǵa sáıkestigi jáne Qazaqstannyń EPS júıesi aıasynda yntymaqtastyqty odan ári damytýǵa daıyndyq máselelerin talqylady.
Koreı delegatsııasy uıymdastyrý deńgeıin, qabyldanyp jatqan sharalardy jáne Qazaqstan Respýblıkasynyń ýákiletti memlekettik organdarmen ózara is-qımylyn oń baǵalady.
— Іrikteýdiń ekinshi kezeńin ótkizý Qazaqstan Respýblıkasy men Koreıa Respýblıkasy arasyndaǵy eńbek kóshi-qony jáne jumyspen qamtý salasyndaǵy ekijaqty yntymaqtastyqty keńeıtý jolyndaǵy mańyzdy qadam sanalady, sondaı-aq qazaqstandyq azamattar úshin shetelde zańdy túrde jumysqa ornalasý aıasynda qosymsha múmkindikter ashady, — delingen habarlamada.
Osyǵan deıin Eńbek mınıstrligi Ońtústik Koreıada zańsyz júrgen qazaqstandyqtarǵa eskertý jasady.