Serikjan Bııashqa qatysty bultartpaý sharasy qoldanyldy - prokýratýra

ASTANA. QazAqparat - Astana qalasynyń Polıtsııa departamenti 2019 jylǵy 10 naýryzda ulttyq alaýyzdyqty qozdyrý kúdigimen Qazaqstan Respýblıkasynyń azamaty Bııash Serikjan ustady, dep habarlady búgin Astana qalalyq prokýratýrasynyń baspasóz qyzmeti.

Buǵan negiz bolǵan Bııash Serikjannyń 2019 jylǵy 8 aqpanda Almaty qalasynda eske alý is-sharasy kezinde ashyq túrde aıtylǵan etnıkalyq qytaılyqtarǵa qarsy «jıhadqa» - soǵysqa shaqyrýy.

Bul fakt boıynsha Astana qalasynyń Polıtsııa departamenti 2019 jylǵy 21 qańtarda  jergilikti turǵynnyń aryzy boıynsha Qazaqstan Respýblıkasy Qylmystyq Kodeksiniń 174-babanyń 2-bóligi boıynsha sotqa deıingi tergeý óndirisin bastady.

Bııash Serikjannyń sózinde ulttyq alaýyzdyqty qozdyrýǵa shaqyrýdyń bolǵany polıtologııalyq saraptamanyń 2019 jylǵy 5 naýryzdaǵy  №499
qortyndysymen, áleýmettik jeliden alynǵan beınejazbalarmen, kýágerlerdiń jaýaptarymen jáne basqa qujattarmen rastalyp otyr.

Kórsetilgen kúdiktige qatysty barlyq is-áreketter ishki ister organdarymen qylmystyq protsestik zańnama aıasynda júrgizilgen.

Búgin, 2019 jylǵy 11 naýryzda Astana qalasynyń mamandandyrylǵan aýdanaralyq tergeý soty Bııash Serikjanǵa qatysty 2 aıǵa «úıqamaq» túrindegi bultartpaý sharasyn sanktsııalady.

Sotqa deıingi óndiris jalǵasýda.