Serikjan Baıbosynov: Ákimderdi saılaý – demokratııany nyǵaıtýǵa baǵyttalǵan mańyzdy qadam
«Bizdiń óndirýshiler negizinen aýyldyq jerlerde turady. Ákimdi tańdaý arqyly olar memlekettik basqarýǵa qatysa alady. «Tyńdaýshy memleket» tujyrymdamasy da osy týraly baıandaıdy. Ákimder halyq aldynda tikeleı esep beredi jáne ózgeniń baǵdarlamalaryna silteme jasamaıdy. Úgit jumystary bastalǵan kezde, olar óz eldi mekenderiniń qajettilikterin eskere otyryp, naqty baǵdarlamalar nemese jobalar usynýy kerek. Adamdar týǵan aýylynyń damýy olardyń azamattyq belsendiligi men tańdaýyna baılanysty bolatynyn túsinýi kerek. Aýyl turǵyndary saılaýǵa belsendi qatysatynyna senimdimin, óıtkeni olardyń árqaısysy kishkentaı Otanyna shyn júrekten alańdaıdy», – deıdi Serikjan Baıbosynov.
Spıker úlken jaýapkershilik aýmaqtyq, ýchaskelik saılaý komıssııalaryna, jergilikti ákimdikterge júkteletinin atap ótti. Kóp nárse olardyń daıyndyq jáne túsindirý jumystaryn qanshalyqty sapaly júrgizetindigine baılanysty bolady.
«Saıası partııalardyń ókilderi ǵana emes, ózin-ózi usynatyn kandıdattar bola alady. Eń bastysy, bıýlletenderde «Bárine qarsy» degen tarmaq bolady. Bul demokratııalyq qoǵamnyń taǵy bir talaby», – dep qosty Serikjan Baıbosynov.
Aıta keteıik, Qaraǵandy oblysynda alǵashqy tikeleı saılaýda 75 aýyl ákimin saılaý josparlanǵan. Saılaý 149 eldi mekende ótedi, onda 134 myńnan astam adam turady, onyń ishinde 81 myńnan astamy saılaýshylar. Saılaýǵa 164 saılaý komıssııasy qatysady - 15 aýmaqtyq jáne 149 ýchaskelik.
25 mamyrda Prezıdent Qasym-Jomart Toqaev saılaý týraly Konstıtýtsııalyq zańǵa ózgertýler men tolyqtyrýlar engizýdi kózdeıtin qujatqa qol qoıǵan bolatyn.
Ulttyq ekonomıka mınıstrligi aýyl ákimerin tikeleı saılaý qalaı ótetindigin jáne QR Prezıdenti Ákimshiligi Basshysynyń orynbasary Málik Myrzalın ákim saılaýyna túsetin kandıdattarǵa qoıylatyn talaptardyń sebebin túsindirdi.
Sondaı-aq, Memleket basshysy aýyl ákimderin saılaý máseleleri jóninde keńes ótkizdi.
