Serikqalı Brekeshev ulttyq geologııa qyzmetin qurý jumysyn aıaqtaýdy tapsyrdy

NUR-SULTAN. QazAqparat – Ulttyq geologııa qyzmetin qurý jónindegi uıymdastyrý sharalary 1 shildege deıin aıaqtalýy kerek. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Ekologııa, geologııa jáne tabıǵı resýrstar mınıstrliginiń aldynda turǵan ekologııalyq barlaý salasyndaǵy mańyzdy mindetterdiń biri - eldiń mıneraldy-shıkizat bazasyn tolyqtyrý. Osyǵan baılanysty Geologııa komıtetimen birlesip, «Qazgeologııa» AQ-yna tapsyramyn. Birinshiden, osy jyldyń 1 shildesine deıin memlekettik jer qoınaýyn basqarý baǵdarlamasyna engizý arqyly jer qoınaýyn paıdalaný quqyǵyn berý úshin qoljetimdi aýmaqtyń ashylýy qamtamasyz etilsin. Ekinshiden, Ulttyq geologııa qyzmetin qurý jónindegi uıymdastyrý is-sharalary 1 shildege deıin aıaqtalsyn», - dedi Serikqalı Brekeshev mınıstrliktiń alqa otyrysynda.

Sonymen qatar ol osy jyldyń 1 mamyryna deıin Tsıfrlyq damý, ınnovatsııa jáne aeroǵarysh ónerkásibi, Indýstrııa jáne ınfraqurylymdyq damý mınıstrlikterimen birge «Qazjer» biryńǵaı platformasynda QR mıneraldy resýrstar ulttyq derekter banki aqparattyq júıesiniń mindetteri men qyzmetterin iske asyrýdy pysyqtaýdy tapsyrdy.

«Memleket basshysynyń batys óńirlerdi damytý jónindegi tapsyrmalaryn iske asyrý maqsatynda 1 sáýirge deıin Qarjy mınıstrligimen Aral munaı-gaz basseıniniń seısmıkasy boıynsha jumys júrgizýge qosymsha qarjylandyrý máselesi pysyqtalsyn», - dedi mınıstr.