Serikqalı Brekeshev mıneraldyq resýrstardyń derekter banki nege iske qosylmaı jatqanyn aıtty

NUR-SULTAN. QazAqparat – Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev mıneraldyq resýrstardyń ulttyq derekter banki nege iske qosylmaı jatqanyn túsindirdi, dep habarlaıdy QazAqparat tilshisi.

«Mıneraldyq resýrstardyń ulttyq derekter bankiniń iske qosýynyń sozylýy sebepterine kelsek, «Tsıfrlyq Qazaqstan» memlekettik baǵdarlamasyna sáıkes júıeni engizý 2019 jylǵy jeltoqsanǵa josparlanǵan. Konkýrs tek 2019 jyly ótkizilip, «Transtelekom» aktsıonerlik qoǵamy jeńimpaz atandy.

Qarjy bólýdi bekitý jáne merdigerdi tańdaý rásimderiniń uzaqtyǵynan, jobany iske asyrý merzimi 2021 jylǵy shildege aýystyryldy. Byltyrǵy jyly aqparattyq júıeniń jumys qabilettiligin testileý birneshe ret ótkizilip, onyń daıyn emestigi anyqtaldy. «KPMG» táýelsiz jobalyq keńsesiniń baǵalaýy boıynsha joba tek 60% paıyz ǵana iske asyryldy. 2,5 mlrd teńge bıýdjet qarajaty Qazynashylyq komıtetiniń shottarynda saqtalýda. Merdigerdiń mindettemesi oryndalmaı, qarajat tólenbedi. Onyń ósimpuly 249 mln teńge boldy», - dedi mınıstr.

Aıtýynsha, bıyl naýryz aıynda Ekonomıkany jańǵyrtý jónindegi ulttyq komıssııanyń otyrysynda atalǵan aqparattyq júıeni «Kaznedra» jer qoınaýyn paıdalanýdyń biryńǵaı platformasy sheńberińde iske asyrý týraly usynys qoldaý tapqan kórinedi.

«Platforma vedomstvoaralyk bolǵandyqtan, jer qoınaýyn paıdalanýshylarmen jumys isteıtin memlekettik organdar da qatysady. Qazir biz Tsıfrlyq damý mınıstrligimen jumys istep jatyrmyz. Osy jyldyń sońyna deıin platformanyń málimetter bazasynyń qurylymy, ınteraktıvtik karta, qatty paıdaly qazbalardy barlaý úshin lıtsenzııa alý bıznes-protsesi sııaqty birqatar komponentteri testilik rejımde jumys jasaı bastaıdy», - dedi Serikqalı Brekeshev.

Eske salsaq, keshe Prezıdent atalǵan vedomstvonyń jumysyna birneshe syn aıtyp, Serikqalı Brekeshevke «sógis» jarııalaǵan edi.

Foto: primeminister.kz