Serikbaı Trumov óńirde jem-shóp daıyndaý jumystary týraly aıtty
«Bıyl óńirde qalyptasqan qýańshylyqqa baılanysty mal azyǵymen qamtamasyz etý máselesi ózekti. Qys mezgiline mal azyǵyn daıyndaý boıynsha arnaıy shtab quryldy. Aýyl sharýashylyǵy mınıstrligimen birlese otyryp, jumystarymyzdy bastadyq. Jalpy, oblys boıynsha qys mezgiline 77 myń tonna shóp pen 53 myń tonnadaı jem kerek. Daıyndalǵan shóptiń kólemi 35 myń tonnany qurady. Onyń 28 700 tonnasy ózge aımaqtardan, ıaǵnı negizinen Aqtóbe jáne Batys Qazaqstan oblystarynan. Qalǵan 3,5 myń tonnasy jergilikti qoryqtardyń aýmaǵynan daıyndaldy», - dedi Serikbaı Trumov.
Onyń aıtýynsha, ózge oblystardan kómek retinde kelgen 2800 tonna tegin jem-shóp qýańshylyq saldarynan zardap shekken sharýa qojalyqtaryna taratyldy.
«Osy rette kómek qolyn sozǵan barsha azamattarǵa jáne QTJ ujymyna oblys halqynyń atynan alǵysymyzdy bildiremiz. Sonymen qatar, bıýdjetten 5,3 mlrd teńge qarajat bólindi. Barlyq aýdanda shóp jınaý bazalary jasaqtaldy», - dedi oblys ákimi.
Budan buryn habarlanǵandaı, mınıstrlik atalǵan óńirlerdi qoldaýǵa qansha qarajat bólingenin baıandady.
Óńirler arasynda azyq-túlikti belgilengen baǵamen ózara jetkizý jáne zardap shekken sharýashylyqtarǵa shóp shabý úshin 130 myń gektarǵa jýyq shabyndyq jer bólý týraly sharttar men memorandýmdar jasaldy.