Serikbaı Trumov mańǵystaýlyqtarǵa úndeý jasady
Mańǵystaý oblysynyń ákimi Serikbaı Trumov qaýipti indet - koronavırýs pen pnevmonııanyń kún saıyn ósip bara jatqanyna alańdap, óńir turǵyndaryn karantın talaptaryn qatań saqtanýǵa shaqyrdy.
«Búgingideı elimiz úshin asa qaýipti bolyp otyrǵan syn sátte sizderge arnaıy ún qatyp otyrmyn. Jaǵdaı óte kúrdeli. Turǵyndar arasynda naýqastardyń sany artyp, aýrýhanalarǵa túsip jatqandar óte kóp. Sońǵy táýlikte óńirde qaýipti indetti juqtyrǵandar sany 208-ge jetti», -dedi S. Trumov.
Oblystaǵy aýrýhanalarǵa bir kúnniń ishinde 72 naýqas túsip otyr. Sońǵy málimetterge sáıkes, búginde dál osy dıagnozben 506 adam em qabyldaýda. Olardyń 31 aýyr, 12 óte aýyr halde jatyr. Aýrýhanalarymyz tolýǵa jaqyn. Ókinishke qaraı bul koronavırýstan kóz jumǵandar sany da kóbeıip barady. Shilde aıy bastalǵaly eki apta ishinde 34 adam qaıtys boldy.
«Jaǵdaıdyń kúrdeliligin eskere otyryp, barshańyzdy sanıtarlyq talaptardy qatań saqtaýǵa shaqyramyn. Byltyrdan beri júzdegen jandy jalmaǵan indettiń betin qaıtarýǵa birlese atsalyspasaq, dárigerlerdiń kómegimen aýyzdyqtaý múmkin bolmaı otyr. Eldiń, jaqyndaryńyzdyń amandyǵy úshin toı, sadaqa jasaýdy, kópshilikti jınaýdy ýaqytsha toqtatýlaryńyzdy suraımyn. Árbir adam jaýapkershilikti tereń sezinbeıinshe, qaýip seıilmeıdi», -dedi ákim óz úndeýinde.
