Serikbaı Trumov Bozjyra shatqalynda týrızmdi damytýǵa qatysty pikir bildirdi
Onyń aıtýynsha, koronavırýs pandemııasy - álemde týrıstik saladaǵy jaǵdaıdyń kúrdelenýine qaramastan, ishki týrızmniń ósýine aıtarlyqtaı yqpal etti.
«Bıyl teńiz jaǵalaýynda bes juldyzdy qonaqúıdiń ashylýymen, óńirge kelgen týrıster sanynyń artqanyn baıqap otyrmyz. Kelgen saıahattaýshylar Mańǵystaýdyń tabıǵı jerlerin de aralap, ásirese Bozjyra shatqalyna qyzyǵýshylyq tanytýda. Bozjyraǵa tek tamyz-qazan aralyǵynda 2 myńǵa jýyq adam barǵan. Keler jyly bul san 5 ese ósedi degen boljam bar. Týrısterdiń qoryqqa beıbereket baryp, ózdiginshe júrýi – tabıǵatqa orasan zııan keltirýde. Sondyqtan Bozjyraǵa baratyn jol salyp, týrısterdiń jaıly demalýyna jaǵdaı jasaýymyz kerek. Prezıdent te osy jaǵdaıǵa baılanysty pikirin bildirip, ekotýrızmdi órkenıetti jolmen damytýdy qoldaıtynyn aıtty. Memleket basshysy tapsyrǵandaı, bul joba sarapshylardyń, qoǵamdyq keńester men jaýapty sala jetekshileriniń oı-pikirleri eskerile otyra júzege asyrylady», -dedi S. Trumov.
Bozjyra aýmaǵynda safarı-otel salý ıdeıasyn «Rixos» qonaqúı keshenin iske qosqan ınvestorlar usynǵan. Qazir jobalaý jumystary júrip jatyr. Investor Bozjyradaǵy qonaqúıdi shatqaldan 2 shaqyrym jerde salýdy usynyp otyr. Jobasy daıyn bolǵan soń qoǵam talqysyna usynylady.
«Bile bilsek, bul – bizge berilip turǵan zor múmkindik. Іri ınvestor el týrızmin damytýǵa mol qarjy quıǵaly otyr. Munaıǵa ǵana táýeldi – bolý bolashaq úshin qaýipti. Kóp eldiń tájirıbesi kórsetip otyrǵandaı týrızmdi damytý arqyly, ekonomıkamyzdy órkendete alamyz. Shaǵyn jáne orta bıznestiń damýyna, jergilikti azamattardyń jumyspen qamtylýyna jol ashamyz. Qurmetti azamattar, jýrnalıster, men de óz elimniń patrıotymyn, týǵan jerimniń janashyrymyn. Azamattarymyz tabys taýyp, jaǵdaıyn jaqsartyp jatsa – qýanamyn», - dedi Mańǵystaý oblysynyń ákimi.
