Serik Jumanǵarın men Aýǵanstannyń saýda mınıstri yntymaqtastyq aspektilerin talqylady

ASTANA. QazAqparat - QR Premer-Mınıstriniń orynbasary – saýda jáne ıntegratsııa mınıstri Serik Jumanǵarın men Aýǵanstannyń saýda jáne ónerkásip mınıstri Alhadj Nurıddın Azızı yntymaqtastyqtyń negizgi aspektilerin talqylady, dep habarlaıdy QR Úkimetiniń baspasóz qyzmeti.

Serik Jumanǵarın sáýir aıynda Kabýlǵa sapary kezinde taraptar elder arasyndaǵy taýar aınalymynyń kólemin $1 mlrd-tan $3 mlrd-qa deıin ulǵaıtý mindetin qoıǵanyn atap ótti.

«Qazaqstandyq kompanııalardyń Kabýlǵa sońǵy saparynyń qorytyndysy boıynsha bizdiń energetıkalyq sýsyndarymyz, un ónimderi, mıneraldy tyńaıtqyshtardyń alǵashqy jóneltilimi boldy, kúnbaǵys maıyna da qyzyǵýshylyq bar. Aýǵanstannan ımportta aýylsharýashylyq ónimderimen qatar toqyma buıymdary paıda boldy. Belsendilik tanytatyn jumys baǵytymyz bar», — dedi Serik Jumanǵarın.

Yntymaqtastyqty jandandyrý úshin aýǵan tarapyna Gerat qalasyndaǵy Qazaqstannyń saýda úıiniń áleýetin paıdalaný jáne Qazaqstanda óziniń saýda ókildigin ashý usynyldy.
Kezdesýge qatysýshylar qoldanystaǵy saýda joldaryn damytý, Aýǵanstan jáne onyń aýmaǵy arqyly taýarlardy jetkizýdiń balamaly baǵyttaryn qurý múmkindikterin talqylady.
Qazaqstan otandyq kompanııalardyń Aýǵanstanda, ásirese kólik, taý-ken, telekommýnıkatsııa jáne aýyl sharýashylyǵy salalarynda iske asyrylatyn basqa da ekonomıkalyq jobalarǵa qatysýyn qarastyrýda.

Atap aıtqanda, bıyl sáýir aıynda qazaqstandyq delegatsııanyń Kabýlǵa saparynan keıin «Qazaqtelekom» AQ Aýǵanstanǵa kommertsııalyq negizde talshyqty-optıkalyq ınternetti jetkizýge aýǵan tarapymen kelisimshartqa qol qoıdy.
Qazaqstan men Aýǵanstan bilim berý baǵytynda da yntymaqtasady. Búginde Ál-Farabı atyndaǵy QazUÝ Aýǵanstannyń 130 stýdenti bilim alýda.
Serik Jumanǵarın qyzyǵýshylyq tanytqan jaǵdaıda Qazaqstanda Aýǵanstannan kelgen stýdentterdiń sanyn kóbeıtýdi usyndy.