Serik Jumanǵarın mamandarǵa alǵys aıtty: Ekibastuz – eńbek adamdarynyń qalasy
Alǵashqy eki kún óte qıyn boldy. Óıtkeni, qaı jerden sý aqqanyn mamandar bilgen joq. Muny tappasa, jaǵdaı tipti kúrdeli bolar edi. Endi qazirgi jaǵdaı tolyq ózgerdi, aqaý oryndary tabyldy, búgin jumystyń 99 paıyzy bitedi. Ekibastuz – eńbek adamdarynyń, jumyskerlerdiń qalasy. Turǵyndardyń ózderi bos otyrmaı, jylý júıesin jóndep, sýyn tógip, jylytýǵa tyrysyp jatyr. Bireýi yzalanyp, narazylyǵyn bildirip, jaman sóz aıtqan joq. Tańǵy 8-de shtab jumysyn bastap, densaýlyq baǵytyndaǵy ǵımarattardy araladyq, biz barǵanda perzenthanada dúnıege sábı keldi. Bul – jaqsy yrym. Ómir jalǵasyp jatyr. Baýy berik bolsyn!
- dedi Serik Jumanǵarın Ekibastuzda ótken baspasóz konferentsııasynda.
Premer-Mınıstr orynbasary apat kezinde jumys istegen mamandarǵa alǵysyn aıtty.
Oblys ákimi birinshi kúnnen beri osynda júr, qarapaıym adamdar óte kásibı jumys istedi. Olardyń jasaǵan árbir qadamy durys boldy, sol úshin bárine rahmet aıtqym keledi,
- dedi S. Jumanǵarın.
Buǵan deıin Serik Jumanǵarın keshke deıin barlyq kópqabatty úılerge jylý beriletinin aıtqan edi.
Esterińizge sala ketsek, 27 qarasha kúni saǵat 1:20 shamasynda Ekibastuz JEO-da qazandyq isten shyǵyp, on mınýttan keıin taǵy úsheýi toqtaǵan bolatyn.
Osydan keıin qaladaǵy balalardy qoldaý ortalyǵynyń tárbıelenýshileri Pavlodarǵa aýystyrylyp, mektep oqýshylary onlaın bilim alýǵa kóshirildi.
Úkimet otyrysynda oblys ákimi Ábilqaıyr Ysqaqov qaladaǵy ahýalǵa qatysty esep berdi.
Premer-Mınıstr Álıhan Smaıylov Ekibastuz qalasyndaǵy jaǵdaıdy qalpyna keltirý boıynsha birqatar tapsyrma berdi.
Úkimet basshysynyń tapsyrmasy boıynsha Premer-Mınıstrdiń orynbasary Serik Jumanǵarın men Tótenshe jaǵdaılar mınıstri ıÝrıı Ilın Ekibastuzǵa bardy. Búgin saǵat 8:00-de ótken Ekibastuzdaǵy tótenshe jaǵdaıdy joıý jónindegi jedel shtabtyń otyrysynda qalanyń jylý jelilerindegi qazirgi jaǵdaı men temperatýralyq rejımdi qalpyna keltirý boıynsha qabyldanyp jatqan sharalar talqylandy.