Serik Jumanǵarın Jingdong Group (JD Group) korporatsııasynyń vıtse-prezıdenti Larrı Lımen kezdesti
Bul týraly QazAqparat QR Úkimetiniń resmı saıtyna silteme jasap habarlaıdy.
Birinshi kezdesý Jingdong Group (JD Group) korporatsııasynyń vıtse-prezıdenti Larrı Lımen ótti.
Ótken jyly kompanııa Global Fortune 500 álemdik reıtınginde 46-orynǵa ıe boldy. Internet alańda JD.com Amazon jáne Alibaba-men birge álemdegi eń tanymal jáne eń alpaýyttardyń biri bolyp tabylady. Basqa eki iri satýshylardan aıyrmashylyǵy, JD.com ózi taýarlardy satyp alýshylarǵa jetkizedi. Holdıngte 560 myń qyzmetker jumys isteıdi, onyń jartysy jetkizý salasynda.
Serik Jumanǵarın kezdesýde elektrondyq kommertsııa álemdik saýdanyń bolashaǵy ekenin atap ótti.
«Bizde 40 jasqa tolmaǵan adamdardyń 85%-dan astamy búginde zattardy onlaın satyp alatyny týraly zertteýler bar. Qazaqstanda elektrondyq saýdanyń úlesi bólshek ishki saýdanyń shamamen 13%-dy quraıdy, 20%-ǵa deıin ulǵaıtýdy josparlap otyrmyz. JD.com bıznesti júrgizýdi jeńildetýge yqpal etedi, shaǵyn jáne orta kásiporyndardyń, tutynýshylardyń múmkindikterin keńeıtedi. Bul biz úshin óte qyzyqty, shaǵyn jáne orta bızneske tsıfrlyq ekonomıkanyń artyqshylyqtaryn paıdalanýǵa kómektesý bizdiń jumysymyzdyń quramdas bólikteriniń biri», — dedi vıtse-premer.
Osy jyldyń mamyr aıynda Memleket basshysy Qasym-Jomart Toqaevtyń Sıanǵa memlekettik sapary aıasynda JD.com platformasynda Qazaqstannyń Ulttyq pavılony ashyldy. Pavılon iske qosylǵan alǵashqy saǵatta 10 myńnan astam tapsyrys kelip tústi, al osy ýaqyt ishinde usynylǵan ónimniń 80%-y satylyp ketti. Pavılonǵa 106 myńnan astam qoldanýshy qol qoıdy.
«Biz elimizdiń ulttyq poshta operatory «Qazposhta» AQ-y arqyly yntymaqtastyqqa múddelimiz. Jaqyn arada poshta jóneltilimderin jiberý qunyn tómendetýdi josparlap otyrmyz. Biz jetkizý ınfraqurylymyn qamtamasyz etýge daıynbyz, biraq jahandyq ınfraqurylymmen ıntegratsııalaý úshin sizdiń aqparattyq júıelerińizben kómekterińiz qajet. Qazaqstanda elektrondyq kommertsııa boıynsha zańnamaǵa túzetýler engizildi. Qazir biz jańa jobamen jumys istep jatyrmyz, Qazaqstanda qosylǵan quny joǵary taýarlardy shoǵyrlandyrý jáne dıstrıbýtsııalaý boıynsha tasymaldaýdyń mýltımodaldy júıesi bar hab quramyz. Taýarlardy tańdaý prıntsıpi boıynsha: ıaǵnı neǵurlym az jáne qymbat bolsa, soǵurlym tıimdi bolmaq. Osy baǵytta yntymaqtasýdy usynamyz», — dep usyndy S. Jumanǵarın.
Qazaqstanda pavılon ashý jáne kásiporyndardy Alibaba platformasyna shyǵarý boıynsha sátti tájirıbe bar. Eksporttaýshylardy qoldaýdyń bul quraly óziniń tıimdiligin kórsetti — shamamen $300 mln-ǵa kelisimshart jasaldy. Álemdik alańdarmen yntymaqtastyq shıkizattyq emes eksportty ilgeriletýge, QR-dan taýarlar jetkizý kólemin ulǵaıtýǵa, sondaı-aq otandyq kompanııalar úshin qyzyǵýshylyq týdyratyn jańa múmkindikterdi ashýǵa serpin beredi.
Óz kezeginde Larrı Lı qazaqstandyq un men keptirilgen túıe súti suranysqa ıe ekenin jáne JD.com saıtynda belsendi saýdalanatynyn atap ótti.
«Onlaın-satyp alýlar qazir burynǵy oflaın formatty almastyrýda. Siz 40 jasqa tolmaǵan satyp alýshylar toby onlaın satyp alýdy qalaıtyn zertteýler týraly aıttyńyz. Bizdiń zertteýlerimiz boıynsha, buryn onlaın satyp alýǵa daǵdylanbaǵan 46 jastan asqan adamdar COVID-19 pandemııasynan keıin ádetterin ózgertti. Biz óz bedelimizdi jáne ónim sapasyn óte joǵary baǵalaımyz. Keıbir tutynýshylar bizdiń baǵamyz basqa saıttarǵa qaraǵanda joǵary deıdi. Biraq QHR-daǵy tutynýshylardyń kópshiligi búginde sapa úshin kóbirek aqsha jumsaýǵa daıyn», — dedi Larrı Lı.
Jıynǵa qatysqan «Atameken» UKP prezıdıýmynyń tóraǵasy Raıymbek Batalov JD.com saıtynda saýda jasaı alatyn qazaqstandyq jobalar pýlyn jiberýdi, sondaı-aq qazaqstandyq bıznesmenderdi saıtta ónimdi satý erejelerine úıretý úshin birlesken baǵdarlama jasaýdy usyndy. Larrı Lı óz tarapynan Ulttyq pavılonda azyq-túlik ónimderiniń jaqsy satylyp jatqanyn atap ótip, mundaı taýarlardy jetkizýdi qarastyrý úshin yntymaqtastyq ornatýdy usyndy.
Búginde JD.com óz jetkizilim qyzmeti arqyly Qazaqstanǵa taýar joldamaıdy.
«Qazaqstan – úlken aýmaq. Sizde ishki kólik pen logıstıka bolǵan kezde kóbirek taýarlar satylady, bul bizdi qyzyqtyrady. Saýdany birge ulǵaıtyp, Qytaı naryǵyna shyǵatyn ónimderdi jaqsartý boıynsha jumys isteı alar edik», — dep usynys jasady kezdesý sońynda Larrı Lı.
Kezdesý qorytyndysy boıynsha taraptar «Qazpochta» AQ ókilderimen logıstıka men taýarlardy jetkizý júıesin qurý boıynsha kelissózderdi jalǵastyrýǵa kelisti.
