Serik Jumanǵarın: Energetıka mınıstrligi bizdiń usynysymyzdy gaz baǵasy 2 ese qymbattaǵanda ǵana eskerdi

NUR-SULTAN. QazAqparat –QR Básekelestikti qorǵaý jáne damytý agenttiginiń tóraǵasy Serik Jumanǵarın áleýmettik mańyzy basym taýar men jetekshi qýat kózderin mamandandyrylǵan elektrondy alańda satýdyń táýekelderi kóp ekenin málim etti, dep habarlaıdy QazAqparat tilshisi.

Agenttik tóraǵasy Facebook-tegi paraqshasynda jyl basynda suıytylǵan gaz baǵasy qalaı yryq bermeı ketkenin túsindirýge tyrysty.

«Suıytylǵan munaı gazynyń saýdasy mamandandyrylǵan elektrondyq alańda júrdi. Energetıka mınıstrligi suıytylǵan gaz saýdasynyń jekelegen qaǵıdalaryn ázirledi. Bul rette otyn-energetıka kesheniniń basqa da taýarlary, mysaly, benzın, dızel otyny, avıakerosın jáne kómir bırjalyq taýarlar tizbesine engizildi.

Osy taýar pozıtsııalary boıynsha bırjalyq saýda-sattyqty aldyn ala ótkizý úshin QR Básekelestikti qorǵaý jáne damytý agenttiginiń janynan memlekettik organdar, naryq sýbektileri jáne ınfraqurylymdyq uıymdar ókilderinen turatyn bırjalyq komıtet, konsýltatıvtik-keńesshi organ quryldy», - dep eske alady agenttik basshysy.

Serik Jumanǵarınniń aıtýynsha, suıytylǵan gaz arnaıy elektrondyq saýda alańynda satylǵandyqtan, ol kúrt qymbattaǵan kezde saýdany ýaqytsha toqtaty turý múmkin bolmaǵan. Óıtkeni Energetıka mınıstrligi arnaıy elektrondy saýda alańynyń erejesin ázirlegen kezde mundaı tetiktiń qajettigin eskermegen.

«Bırjalyq taýarlar saýdasynyń sektsııalyq erejesiniń basty ereksheliginiń biri – bırjalyq komıtet qolaısyz syrtqy jáne ishki jaǵdaılarda saýda-sattyqty toqtata turýǵa quqyly.

Mysaly, byltyr ekinshi toqsanda munaı óńdeý zaýytynyn jumysyn toqtatý saldarynan otyn tapshylyǵy paıda bolǵan kezde munaı ónimderiniń saýdasy 2 aıǵa ýaqytsha toqtatyldy. Maýsym aıynda kómirdiń bırjalyq saýda-sattyǵy tártipke saı ótpegenine baılanysty ýaqytsha toqtatylyp, shilde aıynda qaıta bastaldy.

Sondaı-aq saýda sessııasynda baǵanyń ózgerýiniń yqtımal dálizin + / - 2% deńgeıinde bekitý týraly sheshim qabyldandy. Bul saýda-sattyqta baǵanyń ósýine jol bermeýge múmkindik berdi», - deıdi agenttik tóraǵasy.

Al Energetıka mınıstrligi ázirlegen suıytylǵan gazdy satatyn elektrondy saýda alańynyń jumys erejesinde mundaı tetikter bolmaǵan.

«Suıytylǵan gazdy satý erejeleriniń bırjalyq saýdadan keıbir aıyrmashylyqtary boldy. Mysaly, baǵanyń ózgerý dálizi + / -10% aralyǵynda aýytqydy.

Onyń ústine baǵa shekten tys ósken jaǵdaıda saýda-sattyqty toqtata turý quqyǵy sııaqty quraldar bolǵan joq.

Mamandandyrylǵan saýda alańynyń barlyq kemshilikteri naryq qatysýshylarynyń narazylyǵyna ákeldi. Agenttik Energetıka mınıstrligine suıytylǵan munaı gazyn satý erejelerin ózgertý boıynsha usynystar paketin jiberdi. Agenttik usynǵan túzetýler jeltoqsan aıynda, saýda-sattyqtaǵy baǵa jyldyń basymen salystyrǵanda 2 ese óske kezde baryp qabyldandy.

Tutastaı alǵanda, qandaı da bir taýar úshin jekelegen mamandandyrylǵan saýda alańdaryn qurýdyń orynsyzdyǵyn agenttik pen Energetıka mınıstrligi bırjalyq saýdany damytý máseleleri jónindegi zań jobasyn ázirleý barysynda eskerdi», - dep túsindirdi Serik Jumanǵarın.